Swahili Bible2

14

Buŋoosi bwa Ahiya isi Yerobowamu

1Mu mbuka nyene iyo, Abiya umusooleli wa Yerobowamu walwaala. 2Aryo kila Yerobowamu alomela umukyelama weewe ari, “Yinyukha, utsye nga wifwaananisa khuuba umuundu ukuundi busa, ilekhe khubawo umuundu ukuundi ukhumanyakho nga iwe uli nabakyelama wase ta. Lwanyuma utsye i Shilo w’omuŋoosi Ahiya, lwekhuuba umweene uyo niye uwamboolela ise ari intsya khukhwikyela umuyiinga. 3N’usuteyo ni shiwaanwa she kimikaati likhumi, ni tsikeeki, utubekho ni muka iye bubuushi bwe ntsushi, utsye umureebe khumanya shiina shishinoola khu musooleli.”

4Aryo umukyelama wa Yerobowamu wenyukha waatsya i Shilo wa Ahiya. Khu mbuka yino abe Ahiya s’abona buulayi ta, lwekhuuba abe wahangala mu Miiko. 5Ne Umukasya waalomela Ahiya ari, “Umukyelama wa Ahiya ali khukhwiitsa ano, nga wefwaananisile nga umuundu ukuundi busa. Niye ali khukhwiitsa khukhureeba bibiwaamba khu musooleli waabwe uuli umutsiina. Uryo waakha khuumuboolela shisheene sheesi ikhulomela khuumuboolela.”

Naye aryo umukyelama yuno n’ola, wefwaananisa khuuba umukhasi kuundi busa. 6Ne Ahiya n’awulila khuukuunyaka khwe bikyele byeewe amulyaango, kila aloma ari, “Niwinjile, iwe umukyelama wa Yerobowamu! Lwashiina uli khukhwiitsisatsisa khukhwifwaananisa nga umuundu ukuundi busa? Ise naarumanibwile khuukhuwa iwe kamakhuuwa kamabi. 7Niwileyo, uyilile umuseetsa woowo Yerobowamu kamakhuuwa kano kakaama isi Umukasya Wele wa Isiraeli, uri, ‘Ise nakhutsowesa nakhuwa buukhulu khukhwaama mu baandu ba busheele busa, nakhwikyelisa umuraangilisi we babaandu baase ba Isiraeli. 8Ise samweene nonuula buyiinga buno khukhwaama khu be muungo mwa Dawudi, naabukhuwa iwe. Ne bona iwe waakhuba nga umwakaanisi wase Dawudi n’aba ta. Niye abe awuliilisa kamakaambila kaase, waaloondelela byeesi inoma ni kumwoyo kweewe kwoosi, nga akhola buli shiindu shoosi sheesi ise imulakila niye khuukhola. 9Ne bona iwe waakholile bibyoonako biikali khuufuura abo boosi babaakhwinyoowa iwe. Iwe waayikholela ba wele babaandi. Naluundi waayikhalasa ise naabi lwe khukhwikholela bifwaani bibuumbe, waashuukha waandekha ise. 1014.10: 1 Bay 15.29Ni nashiryo, indi khuutsya khureera buwaangafu khu be muungo mwa Yerobowamu, nga niiraka buli musaani yeesi, na buli musooleli yeesi, oba ali umubowe namwe umulekhuule. Ise kane imalilewo ilala be muungo mw’omuyiinga, nga n’ubona kumulilo ni kwoosha bisaasilo khukhwoolesa ni biweelawo ilala. 11Buli muundu yeesi khu be muungo mwa Yerobowamu ulifwiila mu shiriimba, tsiimbwa nitso tsitsikhaalye kumulaambo kweewe, ni na buli mutweela yeesi ulifwiila iyo mwirome, binywiinywi bye mu ngaaki nibyo bibililya kimilaambo kyaabwe. Shikhaabe shiryo, lwekhuuba Umukasya umweene niye ushilomile.’ ”

12Umuŋoosi Ahiya weloosela ari, “Nashiryo, ari yinyukha wileyo ingo woowo. Ne nikane ube nga winjila mu shiriimba, umusooleli uyo kane afwe. 13Na buli muundu yeesi mu Isiraeli aliisola lwe khuusiikhibwa khweewe. Umweene yuno kane abe niye uwakamayo khu be muungo mwa Yerobowamu mwoosi khuusiikhibwa buulayi, lwekhuuba yenyene niye isi Umukasya Wele wa Isiraeli, ekhoyela. 14N’Umukasya umweene aliifunilayo umuyiinga ukuundi khuuwula Isiraeli, naluundi abe niye uliihesela ilala be muungo mwa Yerobowamu boosi. Shino kane shikholekhe maangu naabi, ni aluno ari. 15Wele kane atengaase Isiraeli, afwaane busa nga lukholo luluutengaasibwa khu meetsi. Kane umweene akhuule babaandu ba Isiraeli bano khuubarusa khukhwaama mu shibala shaabwe shilayi shino, sheesi aakabila bakuuka baabwe. Lwanyuma abayile abasalanisile aleeyi iyo aambi ni luluutsi Efurati. Lwekhuuba nibo baakhalasa Umukasya lwe khukhwisaaya bifwaani bya wele umukhasi Ashera. 16Umukasya aryo alyaantsukha Isiraeli, lwekhuuba Yerobowamu oneka, naluundi waabayila boosi mu khwooneka.”

17Lwanyuma lwa bino byoosi, umukyelama wa Yerobowamu wenyukhawo, weelayo ingo weewe mu shiriimba sha Tiruza. Nga n’akyeenda khukhwiinjila mu ntsu ari, umusooleli waafwa. 18Buli mutweela mu Isiraeli weetsa khuumusiikha ni khuusola, nga ilomo ya Wele ni yaloma khuubirira mu muŋoosi Ahiya.

19Bibiindu byoosi byeesi Yerobowamu aakhola nga ashiili umuyiinga; ibyo byoosi bibiwaamba khu busoolo, ni saambo isi aawulamo, byaronebwa mu Shiitabo she Bibyaamayo bye Bayiinga ba Isiraeli. 20Aryo Yerobowamu waaba umuyiinga wa Isiraeli khuumala kimiiko kamakhumi kabili na kibili. Lwanyuma lwayo nga waafwiile, umusooleli weewe Nadabu wekyela umuyiinga uweelakho.

Rehobowamu umuyiinga wa Yuda

21Biba biryo, Rehobowamu umwaana wa Solomoni niye aaba umuyiinga wa Yuda. Rehobowamu aarakikha khuuwula nga olesa kimiiko kamakhumi kane na mutweela. Aryo waawulila kimiiko likhumi na musaafu mu Yerusalemu, nga nisho shishaba shiriimba sheesi Umukasya aarobola mu bikuuka byoosi bya Isiraeli, khukhwisaayilamo lisiina lyeewe. Lisiina lya maayi weewe lyaba bari Naama, uwaba umu Amoni. 22Babaandu ba Yuda baakhola bye bubwoonaki biikali naabi mu moni ts’Omukasya, baryo baasyubulukhisa lirima lyeewe lwe bibyoonako byaabwe. Lwekhuuba byaba biikali naabi khufuurisakho ni bye bakuuka baabwe. 2314.23: 2 Bay 17.9,10Baryo bombekha bibyeeso bye bukafwiili, baarawo ni bifwaani bye ba wele babaandi, baasimikha ni kimirongoolo kye khukhwisaaya Ashera, wele umukhasi, khu buli lukiingi, ni musina mwa buli kuusaala. 2414.24: Maka 23.17Ni khuulooselakho buubi naabi, yabayo ni bamalaaya basaani mu mesaayilo kaabwe mu shibala. Babaandu baatsya nga bakoopa bibiindu bye bunyaalu bye kamanaambo kakaandi keene keesi Umukasya aatimisamo nio babaandu ba Isiraeli beetsamo.

2514.25: 2 Kim 12.2-8Mu mwiiko kwe kharaano kwe buwuli bwa Rehobowamu, umuyiinga Shishaka uwe Misiri weetsa webwakala Yerusalemu. 2614.26: 1 Bay 10.16,17; 2 Kim 9.15,16Waatsya waanuula buli shiindu she kumukaso khukhwaama mu Liisaayilo Liikhulu ly’Omukasya, ni khukhwaama mu lubili lw’omuyiinga. Waasuta na buli shiindu shoosi, waayililamo ni tsingabo tse zaabu, tseesi Solomoni aakhola. 27Rehobowamu weelayo waakhola tsingabo tsitsiindi tsa buroonzi, khukhwiisa mu shifwo sheetso tseesi baayila. Tsino waatsiwaambisa baakhulu babaaliinda khu shilibwa she ntsu y’omuyiinga. 28Aryo abe buli lweesi umuyiinga atsiila mu Liisaayilo Liikhulu ly’Omukasya, baaliindi abe basuta tsingabo tsino, ne lwanyuma baatsiisayo mwibiikhilo lyatso.

29Bibiindu bibiramile byoosi byeesi Rehobowamu aakhola nga ali umuyiinga, byaaronebwa mu shitabo she Bibyaamayo bye Bayiinga ba Yuda. 30Aryo aabatsakawo busoolo bubukhakama ta akari a Rehobowamu ni Yerobowamu. 31Iryo imbuka ni yoola Rehobowamu waafwa, baamusiikha mu ŋani tse bayiinga mu shiriimba sha Dawudi. Maayi weewe abe lisiina bari Naama, umukhasi umu Amoni. Lwanyuma lwayo umusooleli weewe Abiyamu waamwiilila mu bikyele nga umuyiinga.