Swahili Bible2

12

Bikuuka bye Ngaaki biiyawukhakho

1Rehobowamu waatsya i Shekemu, lwekhuuba ba Isiraeli boosi abe beetsile ibweene iyo khumwikyelisa niye umuyiinga. 2Ne Yerobowamu umusooleli wa Nebati n’awulila bibiili khuutsya mu moni, wenyukha khukhwaama i Misiri isi aba amenya, lwekhuuba aatitukhilayo khukhwibisa khu Solomoni, aryo waakobola. 3Babaandu khukhwaama mu bikuuka bye ngaaki bya Isiraeli baamurumanisa. Baryo niye atweela ni babaandu boosi baatsya khubona Rehobowamu, baamulomela bari, 4“Paapa woowo Solomoni aakhuwaanyiinyatsaka waakhuraambisa kimilimo kimisiro naabi. Ne ari khukhuloomba khuri wanguyisekho khu busiro ubwo bweesi paapa woowo aakhurakho, ni nafwe kane khube aasi owo, naluundi khukhole buli shoosi sheesi kane ukhulakile khuukhola.”

5Rehobowamu naye waabeelamo ari, “Ari ni mumbeyo biifukhu bitaru, imbe nga nambaasa khu shiindu isho, nio lwanyuma mwiitse mukobole, imbeelemo.” Baryo babaandu tsana baarurawo baatsya.

6Lwanyuma umuyiinga Rehobowamu waatsya waakaananamwo ni baasakhalu, babaaraambakho ni paapawe Solomoni, khulwe lomo yino, waabareeba ari, “Makyesi shiina keesi muumba nio inyale khukhwiilamo babaandu bano?”

7Basakhulu bano nabo baamwiilamo bari, “Iwe siinga ufukiilila khukhwikyela umwakaanisi we babaandu bano khu shifukhu shino, uli ni khuufukiilila khuubakanikhayo ni tsilomo tsindayi tse shiisa, nabo baryo kane babaatsake babaakaanisi boowo biifukhu byoosi.”

8Ne Rehobowamu waalekha khufukiilila bilomo bye kamakyesi byeesi baasakhalu baamuboolela ta, waatsya wakaananamwo ni basooleli beesi aatsowa nabo, nga khu mbuka yino baaba bali babaakaanisi beewe. 9Waabareeba ari, “Inywe muwa makyesi shiina, nio khubeelemo babaandu bano babeetsile isi ndi nga banoma bari imbanguyisekho buusiro bwe kimilimo kyeesi paapa wase aabaraambisatsaka?”

10Basooleli tsana bano babaatsowa ni naye baamwiilamo nga bamuloma bari, “Tsya uboolele babaandu bano babaakhulomele bari, ‘Paapa woowo Solomoni akhuwaanyiinyatsaka wakhuraambisa kimilimo kimisiro naabi. Ne ari khukhuloomba khuri wanguyisekho khu busiro ubwo bweesi paapa woowo aakhurakho, ni nafwe kane khube aasi owo, naluundi khukhole buli shoosi sheesi kane ukhulakile khuukhola,’ kane ubalome uri, ‘Khakhaala khe khu mukhono kwase khakyeekhe, khali khakali naabi khufuurisa mu shibuno mwa paapa wase. 11Ilala siinga nga paapa wase aabaraambisatsaka kimilimo kimisiro naabi, ise ndi khuutsya khulooselakho kifuurewo. Niye aabawatsaka bitaambiso nga abakhupa ni tsikhoba, ise intsya khuraambisa tsikhoba nga tsilikho ni bibyuuma bibyooki.’ ”

12Bifukhu bitaru tsana ni byawakho, Yerobowamu ni babaandu tsana bakobola isi Rehobowamu, khuwulila byeesi ababoolela. 13Rehobowamu weelakamo babaandu bano ni buurafu, lwekhuuba aba waalekhile kamakyesi keesi baasakhalu baamuwa. 14Niye aabeelakamwo buubi aryo, nga aloondelela kamakyesi keesi basooleli baamuwa, nga aloma ari, “Ilala siinga nga paapa wase aabaraambisatsaka kimilimo kimisiro naabi, ise ndi khuutsya khulooselakho kifuurewo. Niye aabawatsaka bitaambiso nga abakhupa ni tsikhoba, ise intsya khuraambisa tsikhoba nga tsilikho ni bibyuuma bibyooki!”

15Aryo umuyiinga waalekha khuwuliilisa byeesi babaandu belootsa ta. Bino byoosi byafwaana biryo, lwekhuuba byaba byoolelesa ilomo y’Omukasya khubirira mu muŋoosi Ahija uwe Shilo, nga itsya isi Yerobowamu.

1612.16: 2 Sam 20.1Baryo ba Isiraeli boosi ni baabona bari umuyiinga waalobile khuubawa sheesi baakana, baalomela angaaki bari, “Ari ifwe khuli na mukabo shiina mu Dawudi? Sikhushiiliyo ni busikha buundi mu musooleli wa Yese ta. Inywe ba Isiraeli, yinyukha khwiileyo ingo! Ari lekha be ntsu ya Dawudi bewulile babaandu baabwe.” Baryo babaandu ba Isiraeli baakobolakayo ingo waabwe. 17Aryo Rehobowamu waarama nga niye umuyiinga we babaandu ba Isiraeli babaaba nga bamenya mu biriimba bye mu shisiintsa sha Yuda.

18Umuyiinga Rehobowamu waarumana Adoramu, uwaba nga niye ukhulila bye kimilimo kimisiro, khuutsya khukanikha isi babaandu. Ne ba Isiraeli boosi baamukhupa kamabaale, baamwiira. Ne kamakhuuwa kano nikoola isi umuyiinga Rehobowamu, waayuubakilisa khaangu, waatimaka waatsya wekaama khu shikaari sheewe, wekhuuna tsiindimo khuukobolayo i Yerusalemu. 19Baryo babaandu be mu bikuuka bye shisiintsa she ngaaki bya Isiraeli, bekaanila ilala khuuwulibwa n’umwitsukhulu wa Dawudi yeesi, khukhwoolesa ni shaleelo shino.

20Baryo ba Isiraeli boosi ni baawulila bari Yerobowamu waakobola khukhwaama mu Misiri, baamulaanga khukhwiitsa mu lubuusano lwaabwe, baamukhola niye khuuba umuyiinga wa Isiraeli12.20 Ano Isiraeli shimanyisa bikuuka likhumi bye shisiintsa she ngaaki yeesi. Shiryo shikuuka sha Yuda shonyene nisho shisharama nga shiwulibwa n’umuundu khukhwaama mu ntsu ya Dawudi.

Buŋoosi bwa Shemaya

(2 Bye Kimiboolo 11.1-4)

21Nga Rehobowamu n’amala khukhwoola i Yerusalemu, waabuusanisa atweela baselikhale baboola kumweeka mutweela ni kimikaanda shinaane (180,000), khukhwaama mu Yuda ni mu Benyamini, ari batsye basoolanise ba Isiraeli be ngaaki, babakobose aasi e buunyala bweewe. 22Ne Wele waalomela Shemaya umuŋoosi ari, 23atsye alomele Rehobowamu, umusooleli wa Solomoni, umuyiinga wa Yuda, ni babaandu boosi babaamenya mu Yuda ni mu Benyamini nga abareewula ari, 24“Mukhatsya khusoolanisa babaandu ba Isiraeli ta, bali baalebe beenywe. Ne buli muundu n’akoboleyo ingo weewe, lwekhuuba shino shishikholikhile shaama isi ise.” Baryo baawuliilisa buurume bw’Omukasya, beelakayo ingo waabwe, nga Umukasya n’alakila.

Yerobowamu ekholela bifwaani bye Zaabu

25Lwanyuma Yerobowamu weyombekhela shiriimba Shekemu, shishiili mu shibala she tsingoongo sha Efurayimu, waatsya wamenyatsaka mu bweene umwo. Waama awo waatsya wombekha shiriimba Penueli nasho. 26Lwanyuma kila elomela mu mwoyo kweewe ari, “Ise nga naakhwiitsiliilisa buulayi, buyiinga buno bunyala bwaakobolayo mu be muungo mwa Dawudi. 27Babaandu bano ni baba nga batsya i Yerusalemu mu Lisaayilo Liikhulu ly’Omukasya, khuutsya khuwaanayo tsisaayilo, banyala bashuusa kimyoyo kyaabwe khukhwiila khu Rehobowamu, umuyiinga wa Yuda. Baryo kane bantsire ise, bekyelise Rehobowamu khuuba umuyiinga waabwe mu shifwo shase.”

2812.28: Luky 32.4Aryo lwanyuma lwe khuufuna kamakyesi khukhwaama mu bakhulu babaandi, umuyiinga waakholayo bifwaani bibili bye tsimoosi tse zaabu. Kila alomela babaandu ari, “O baandu ba Isiraeli, inywe lukyeendo lubabeelatsakiile luleeyi naabi khuutsyatsaka khukhwisaayila i Yerusalemu! Bona ari ba wele beenywe abashiina, babaabareera inywe khukhwaama mu shibala she Misiri.” 29Aryo waara shifwaananyi she moosi iye zaabu shishiindi i Beseri, ni shishiindi waashira i Dani. 30Shino sheesi baakhola shekyela shishoonako shikali naabi, lwekhuuba babaandu baatsyatsaka khukhwisaaya shifwaananyi shishaba i Beseri, ni shishiindi shishaba i Dani.

31Yerobowamu wombekhayo buuyu khuuba bwe khukhwisaayilamo, waaroboraka ni basaayi khukhwaamaka busa mu baandu, babaakhaaba mu luruungo lwe busaayi lwa Levi ta.

Khuusaaya bifwaani i Beseli

3212.32: Lev 23.33,34Yerobowamu waarakikhisayo kamayiiya kamashaakha, kakaaba ke khuuliila khu shifukhu she likhumi na biraano, mu mweesi kwe shinaane, nga ni baashikholatsaka mu Yuda. Khu shifukhu isho, Yerobowamu umweene waatsya i Beseli, wawaanayo tsisaayilo khu sheeso, nga awaanayo isi shifwaananyi she moosi she zaabu sheesi arawo. I Beseli weene iyo, waarayo basaayi, khukhwakaanisatsaka mu buyu bwayo bwe khukhwisaayilamo. 33Khu shifukhu isho sheesi umweene arawo, Yerobowamu umweene awaanayo tsisaayilo khu sheeso she Beseli. Wakhalawo khurawo kamayiiya ako mu Isiraeli, umweene isi atsyaatsakila khu sheeso khukhwoosha bubaane.