Swahili Bible2

4

Lisaaye lya Yuda

1Yuda aasaala basoleeli baraano, nga nibo: Perezi, Hezironi, Karimi, Huru, ni Shobali. 2Shobali wasaala Reyayiha; Reyayiha wasaala Yahasi; Yahasi wasaala Ahumayi ni Lahadi. Bano nibo bakuuka be lisaaye lilyamenya mu Zora. 3-4Huru aaba umwaana umukiboole uwa Kalebu ni Efurasi. Batweela khu lisaaye lya Huru baatsya baamenya mu shiriimba she Beselehemu. Lisaaye lya Huru lyabamo bano: Etamu, Penueli, ni Ezeri. Lisaaye lya Esamu lyabamo bano: Yezureeli, Ishima, Idibashi, n’umukhaana bari Hazeleponi. Penueli amenya mu shiriimba she Gedori, ne Ezeri wamenya mu shiriimba she Husha.

5Ashuru uwatsya waamenya mu shiriimba she Tekowa, aaba ni bakhasi babili, nga nibo Hela ni Naara. 6Ashuru wasaala mu Naara babaana bano: Ahuzamu, Heferi, Temeni, ni Hahashitari. 7Ashuru wasaala mu Hela babaana bano: Zeresi, Izara, ni Esinani.

8Kozi, uwasaala Anubu ni Zobeba, niye mutweela uwaba umukuuka uwe bikuuka bya Ahariheli, nga mulimo babaana ba Harumu.

9Yabezi waaba uwe lukoosi naabi khuuminyisakho babandaaye boosi, ni maayi weewe aamutwiikha lisiina ari Yabezi, lilimanyisa liri, “Khulwekhuuba ise namusaalila mu butsiina.” 10Yabezi waaloomba isi Wele wa Isiraeli nga aloma ari, “Ikhuloomba ndi khali iwe umbeele ise tsikhabi, naluundi ubalaayisa tsintsakha tse liiswa lyase. Naluundi khali kamaani koowo kabeele ni nase, uniinde ise khukhwaama isi bukosi bwoosi!” Wele waamuwa byeesi aaloomba.

11Kelubu, wandaaye uwa Shuha, niye uwasaala Mehiri; Mehiri wasaala Eshitoni. 12Eshitoni wasaala Beserafa, Paseya, ni Tehina; Tehina wasaala Irinahasi. Babaandu bano ni be muungo mwaabwe bamenyatsaka mu shiriimba shishilaangibwa shiri Reka. 13Babaana ba Kenazi baaba nibo: Osinelo ni Seraya. Osinelo wasaala Hasasi. 14Mewonosayi wasaala Opura. Seraya wasaala Yowabu; Yowabu wasaala Geharasimu.4.14 Geharasimu shimanyisa litila lye Buubasi. Balilaanga baryo khulwekhuuba abe babaandu bayo bali baabasi. 15Kalebu umwaana uwa Yefune wasaala bano: Iru, Ela ni Naamu. Ela wasaala Kenazi. 16Yehaleli wasaala Zifu, Zifa, Tiriya ni Asareli. 17Ezira wasaala bano: Yeseri, Meredi, Eferi ni Yaloni. Mutweela khu bakhasi beewe bari Bisiya, uwaba umukhaana uwa Faraawo, isi Meredi aayila wasaala Miryamu, Shamayi ni Ishiba. Ishiba wasaala Eshitemowa. 18Umukhasi weewe Umuyudaaya waamusaalila Yeredi. Yeredi wasaala Gedori, Heberi ni Yekuseli. Heberi wasaala Soko; Yekuseli wasaala Zanowa. 19Hodaya wasaala babaana babasaala Keyila uwaama i Garamite; ni Esitemo, uwaama i Makasite. Maayi uwe basoleeli ba Hodaya aba ni yaaya weewe umukhaana bari Nahamu. 20Shimoni aasaala bano: Amunoni, Rina, Benihanani ni Tiloni. Ishi wasaala Zohesi ni Benizohesi. 21Shela umwaana uwa Yuda wasaala Eri, Lada ni be nda iye babaakhola tsingubo i Besibeya. Eri wasaala Leka. Lada wasaala Maresha. 22Yuda weloosela wasaala Yowakimu, ni basaani babaamenya i Kozeba, wasaala ni Yowasi, ni Sarafu, uwaba umuwuli i Mowabu, ne waakelasawo waakobola i Beselehemu. 23Abano baaba baabuumbi be tsinyuungu nga bamenya i Netayimu ni Gedera. Baamenya ibweene iyo nga baraambira umuyiinga.

Lisaaye lya Simeoni

24Lisaaye lya Simeoni nilyo lino: Nemweli, Yamini, Yaribu, Zera ni Shawulo. 25Shawulo wasaala Shalumu; Shalumu wasaala Mibusamu; Mibusamu wasaala Mishima. 26Mishima wasaala Hamweli; Hamweli wasaala Zakuri; Zakuri wasaala Shimeyi. 27Shimeyi aaba ni basooleli likhumi na basesaba, ni bakhaana basesaba. Ne babandaaye baalekha khuuba ni babaana baakali nga niye ta; ikhaba namwe lisaaye lyaabwe lyaalekha khuubalaaha nga be nda iya Yuda ta. 284.28: Yos 19.2-8Bano baamenya mu Berisheba, Molada, Hazara Shula, 29Biliha, Ezemu, Toladi, 30Besweli, Homa, Zikulaga, 31Besimakabosi, Hazasusimu,, Besibiri, ni Sharayimu. Bino nibyo bibyabaatsaka biriimba byaabwe khukhwoolisa nga Dawudi n’ekela umuyiinga. 32Bibyaalo ni biriimba abe bibibebotookheleele byaba nibyo: Etamu, Ayini, Rimoni, Tokeni ni Ashani. 33Khuutubakho ni bibyaalo abe bibibebotookheleleele khuutsya khukhwoola i Bali. Buno nibwo bubwaba buumenyo bwaabwe, naluundi baaronatsaka luruungo lwe khuusaalikha khwaabwe.

34Mwabamo bano: Meshobabu, Yamuleki, Yosha umwaana uwa Amaziya, 35Yoweli, Yehu umwaana uwa Yoshibiya, naluundi umwitsukhulu uwa Seraya nga ali shisoni sha Asiyeli, 36atweela ni Eliyenayi, Yakobo, Yeshohaya, Asaya, Adiyeli, Yesimiyeli, Benaaya, 37ni Ziza umwaana uwa Shifi. Shifi usaala Alooni, Alooni usaala Yedaya, Yedaya usaala Shimuri, ni Shimuri niye usaala Shemaya. 38Abo beesi babuulile kamasina, baaba baawuli mu bikuuka byaabwe. Kamasaaye kaabwe kaabalaaha naabi. 39Baabalaaha boola ni khuutsya khuumenya aambi ni Gedori, ibwaamanyaanga we litila, nga baweentsa kamaayilo ke bibyaayo byaabwe. 40Baanyoola kamaayilo kamalayi naabi, nga liiloba lili libalaayi naluundi nga asila busa, nga mbaawo shishibataambisa ta. Be inda ya Hamu nibo abe babaamenyatsaka mu liloba ilyo. 41Basaani bano, beesi kamasina kaabwe karonibwile, baatsya mu liloba lino mu biseela byeesi Hezekiya aaba nga ali umuyiinga wa Yuda. Bebwaakala be inda ya Hamu abe isi bamenya, atweela ni ba Menute, atweela baabamalilawo ilala boosi. Bano beela mu bifwo byaabwe, khulwekhuuba abe iliwo kamaayilo kamalayi ke bibyaayo byaabwe. 42Batweela khu nibo, nga boola basaani bitoondo biraano (500), nga be nda iya Simeoni, baatsya bebwaakala babaamenya mu Lukiingi Seyiri. Baaraangilisi baabwe baaba nibo Pelatiya, Neyariya, Refaya ni Uziyeli. Nga bano boosi bali babaana ba Ishi. 43Baakhoonya abe ba Ameleki babaaramayo nga batitukha khukhwaama mu bisiintsa bibiindi. Bano baamenya mu liloba ilyo khukhwoolisa ni shaleelo.