Swahili Bible2

29

Biwaanwa mu khwombakha Lisaayilo

129.1: 1 Kim 22.5Kila Dawudi aboolela lituuli lye babaandu lyoosi abe lilibuusaane ari: “Umwaana wase Solomoni, isi Wele aroboore khuuba umuyiinga, ashiili umukyeekhe, naluundi ashiili khumanya bibiindu biikali ta, ne buraambi buliwo bukali. Khulwekhuuba buraambi buno sibuli bwe khukhwombakha lubili lw’omuyiinga ta, ne akhali Lisaayilo ly’Omukasya Wele. 2Nashiryo ise naakhakilekho nga n’inyala khuurawo bibiindu bye khukhwombakha Lisaayilo lya Wele, nga nibyo bino: izaabu, ifeetsa, buroonzi, bisaala, kamabaale onikisi kamakali naabi, ni ke khukhwombakhila, ni kamabaale kakaandi ke tsiraangi tsitsikhali indweela ta. 3Khufuurisila ilala, khuloosela khu biindu bino byoosi, ise ndi ni libiikhilo ly’ezaabu iyase khubwase busa, n’ifeetsa. Khulwe khuukana khweesi ise inganamo Lisaayilo lya Wele, bino nabiweeleyo khuraambisibwa mu buraambi ubwo. 4Naluundi naweeleyo tsi talanta bikana bitaru (3,000) tsye zaabu indaayi iyaama i Ofiri, ni tsi talanta bikana musaafu (7,000) tsye feetsa indaayi naabi, khuumaala khu biseenge bye Lisaayilo, 5naluundi ni zaabu, ni feetsa byeesi baraambi bakhaakholemo bibiindu bibikanibwa. Naanu ukuundi uwiweeleyo umweene khu bweewe busa, waareera biwaanwa isi Umukasya?”

6Kila baaraangilisi ba buli lisaaye mu Isiraeli, ni baaraangilisi be bikuuka, ni baaraangilisi be kamaye ke bitoondo ni bye kimikaanda, ni baaraangilisi be buwuli, nabo bawaanayo biwaanwa khu bwaabwe nga bekanisa busa. 7Khulwe buraambi bwe Lisaayilo, bawaanayo tsi talanta bikana biraano (5,000), ni kamapeesa k’ezaabu kumukaanda mutweela (10,000), tsi talanta tsy’efeetsa kumukaanda mutweela (10,000), ni tsi talanta tsye biibya kumweeka mutweela, kumukaanda mutweela, ni bikana shinaane (118,000). 8Abo boosi abe babaali ni kamabaale ke buukusi bwe angaaki naabi, baakawaanayo mu libiikhilo lye Lisaayilo, nga Yehiyeli umu Gereshoni niye ubiloleelela. 9Shino shaakila babaandu basangaala naabi khulwe bibiindu bibyaweebwayo nga babeene bekaniile busa. Khulwekhuuba yaba buli mutweela waweeleyo isi Umukasya ni kumwoyo mutweela. Umuyiinga Dawudi naye wasangaala naabi.

Dawudi aruuya Umukasya

10Nashiryo Dawudi waaruuya Umukasya mu moni tsye babetsuule boosi, nga aloma ari: “Umukasya, iwe Wele wa kuuka weefwe Isiraeli, ubuyilibwe biilo ni biilo. 1129.11: Mat 6.13Khulwekhuuba Mukasya, buukhulu, ni kamaani, ni shiriifwa, ni khuufuura mu busoolo, ni khuuba angaaki, byoosi bili bibyoowo. Byoosi bibiili mwikulu ni bibiili khu shibala, bili bibyoowo. O Umukasya, buyiinga buli bubwoowo, naluundi iwe uli uwe angaaki khuuminyisa boosi. 12Shiriifwa ni lukoosi byaama isi iwe, naluundi iwe uli umuwuli uwa byoosi. Buunyala ni kamaani byaama isi iwe; naluundi iwe niye uuli ni buunyala bwe khuuwa babaandu kamaani ni buukhulu. 13Nashiryo, ari ifwe khukhusiima iwe Wele weefwe, naluundi khuruuya lisiina lyoowo lye shiriifwa.

14“Ne ise niye naanu, namwe babaandu baase nibo naanu, nio khulome khuri khwaawaanileyo nga khwikanisa busa? Khulwekhuuba bibiindu byoosi byaama isi iwe, ni byeesi ifwe khuwaanileyo byaama khu byeesi iwe ukhuwa ifwe. 15Isi iwe khubirawo busa nga baakeendaani, khwaarurawo khaangu busa, nga bakuuka beefwe ni baaba. Buulamu bweefwe khu shibala shino sibuli bwe biilo byoosi ta, khulwekhuuba ifwe khukoraanawo busa nga shishiniini. 16Mukasya Wele, bino byoosi byeesi ifwe khuwaanileyo khukhwoombakhila iwe Lisaayilo, byaamile mu makhono koowo, naluundi bili bibyoowo wamweene. 17Wele wase, ise naashimanyile indi iwe uweentselesa mu mwoyo kw’omuundu, naluundi iwe winyayila uyo ukhekholisa busa ta. Mu bwaŋali bwe kumwoyo kwase, bibiindu bino ise naabiweeleyo ni kumwoyo mutweela, naluundi nase naaboone babaandu boowo babaali ano, nga nabo bawaanayo ni kumwoyo mutweela n’isangaalo. 18Mukasya Wele uwe bakuuka beefwe, Iburayimu, Isaaka, ni Isiraeli, khali busheele ibeelatsakilewo ni ntsambaasa ifwaanana iryo mu baandu boowo, naluundi uraangililatsake kimyoyo kyaabwe. 19Khali uweele umwaana wase Solomoni kumwoyo kwe khuuloondelela kamakaambila koowo, ni biilakilo byoowo, ni byeesi iwe uleekela, nio akhole byoosi byeesi iwe ukana, naluundi anyalise khukhwombakha Lisaayilo nga araambisa byeesi ise inengekharengikhile.”

20Kila Dawudi alomela be lubuusano boosi ari, “Ni muruuye Umukasya Wele weenywe.” Be mu lubusano boosi baruuya Umukasya Wele uwe bakuuka baabwe; beenamisa kimirwe kyaabwe bakitiila khwiloba, besaaya Umukasya nga bamwiisamo shiriifwa. 21Kila bawaanayo biwaanwa isi Umukasya. Khu shifukhu shisheelakho, bawaanayo isi Umukasya bibiindu bino: tsiyeeyi shikana shitweela (1,000), kamamiiku shikana shitweela (1,000), kamasheese shikana shitweela (1,000), ni bye khunywa bibitsiilakho, ni biwaanwa bibiindi biikali busa khukhwaama mu Isiraeli yoosi. 22Khu shifukhu isho baalya naluundi baanywa ni kumwikhoyo kumukali naabi.

Beelamo kumuluundi kukuukhola khabili khukhwikhasa Solomoni umwaana Dawudi, khu shitsoloŋo nga umuyiinga. Baamutsukhakho kamafura baamubiita khuuba umuwuli w’Omukasya, ni khu Zadoki, khuuba umusaayi.

2329.23: 1 Bay 2.12Nashiryo Solomoni wekhala khu shitsoloŋo she buyiinga nga eela mu bikyele bya Dawudi, paapa weewe. Waaba umuwuli umulayi naluundi ba Isiraeli boosi bamuwulila. 24Baraangirisi boosi ni basilikhale be kamaani, ni babaana b’omuyiinga Dawudi, beyama bari bakhaawulilatsake Umuyiinga Solomoni. 25Umukasya waayeeta Solomoni, ni Isiraeli yoosi yaawa buyiinga bweewe shiriifwa, naluundi ni khuumurya khwe angaaki abe shishikhabaatsakawo khu muyiinga yeesi mu Isiraeli ta.

Bibiwaamba khu muyiinga Dawudi

26Dawudi umwaana uwa Yese, aawula Isiraeli yoosi, 2729.27: 2 Sam 5.4,5; 1 Kim 3.4khuumala kimiiko kamakhumi kane. Aawula khuumala kimiiko musaafu nga ekhala mu Heburoni, ni khuumala kimiiko kamakhumi kataru na kitaru nga ekhala mu Yerusalemu. 28Waafwa nga ali umusakhulu, uwaangaale mu miiko, nga ali ni buyiindifu, ni shiriifwa. Umwaana weewe Solomoni waamwiilila mu bikyele byeewe waaba umuyiinga. 29Bikholwa byeesi umuyiinga Dawudi aakhola, khukhwaama makiboole khukhwoolisa khu bimaliilisi, byoosi byaronebwa mu Bitabo bye bibyakholikha Khaale bye baŋoosi Samweli, Nasani, ni Gadi. 30Bibyaronebwa ibyo byokesana buwuli bweewe nga ni bwaba, kamaani keesi aaba ni nako, bibiindu byoosi bibyamukholikhakho ni bibyakholikha khu Isiraeli, ni bibyakholikha khu buyiinga bubwaba bwaamwibotookheleele.