Swahili Bible2

27

Dawudi arawo baaraangilisi be kamaye

1Luno nilwo luruungo lwe baaraangilisi be ba Isiraeli khutsiila khu ntsu ni bikuuka, nga abe nibo babaali baawuli mu buli intsu. Mulimo baaraangilisi be kamaye babaraangilila bibuli bye bikana ni bye bitoondo, nga bayuusaŋana buraambi buli mweesi, khukhwoolisa kumwiiko ni kuwakho. Buli kuubuli abe kulimo basilikhale kimikaanda kibili ni bikana bine (24,000).

2Yashobeyamu umusoleeli uwa Zabudiyeli, abe niye umuraangilisi uwe shibuli shishinyoowa, nga baraamba mu mweesi kukuunyoowa. Mu shibuli sheewe abe mulimo babaandu kimikaanda kibili ni bikana bine (24,000). 3Yeshobeyamu yuno abe ali uwe mu lisaaye lya Perezi, naluundi abe niye umuraangilisi uwe baakhulu be mu maye boosi, mu mweesi kukuunyoowa.

4Dodayi uwe lisaaye lya Ahohi, niye uwaba umuraangilisi uwe shibuli shishikhola khabili, nga baraamba mu mweesi kukuukhola khabili. Mu shibuli sheewe abe mulimo babaandu kimikaanda kibili ni bikana bine (24,000). Mikilosi abe niye umwililakho mu buukhulu.

5Benaaya umusoleeli uwa Yehoyada umusaayi, niye uwaba umuraangilisi uwe shibuli shishikhola khataru, nga bano baraamba mu mweesi kukuukhola khataru. Mu shibuli sheewe abe mulimo babaandu kimikaanda kibili ni bikana bine (24,000). 6Benaaya yuno abe ali umusaani uwe kamaani nga ali mutweela khu Kamakhumi Kataru tsana, nga niye umuraangilisi uwaabwe. Umusoleeli weewe bari Amizabadi, naye abe ali mu shibuli shino. 7Asaheli wandaaye uwa Yowabu abe niye umuraangilisi uwe shibuli shishikhola khane, khuraamba mu mweesi kukuukhola khane. Abe umusoleeli weewe Zebadiya niye umuloondelakho khu buraangirisi mu shibuli isho. Mu shibuli sheewe abe mulimo babaandu kimikaanda kibili ni bikana bine (24,000). 8Umuraangilisi uwe shibuli shishikhola kharaano bari Shamusi, uwe mu lisaaye lya Izarahi. Shino sharaamba mu mweesi kukuukhola kharaano, nga shilimo babaandu kimikaanda kibili ni bikana bine (24,000). 9Umuraangilisi uwe shibuli shishikhola khasesaba bari Ira, umusoleeli uwa Ikesi umu Tekowa. Shino sharaamba mu mweesi kukuukhola khasesaba, nga shilimo babaandu kimikaanda kibili ni bikana bine (24,000). 10Umuraangilisi uwe shibuli she kumusaafu shisharaamba mu mweesi kukuukhola musaafu, bari Helezi uwe lisaaye lya Efurayimu, nga aama i Peloni. Mu shibuli shino abe mulimo babaandu kimikaanda kibili ni bikana bine (24,000). 11Umuraangilisi uwe shibuli she shinaane shisharaamba mu mweesi kukuukhola shinaane, bari Sibekayi, uwaama mu lisaaye lya Zera, nga aama i Husa. Mu shibuli shino abe mulimo babaandu kimikaanda kibili ni bikana bine (24,000). 12Umuraangilisi uwe shibuli she shisyeenda shisharaamba mu mweesi kukuukhola syeenda, bari Abiyezeri, uwe lisaaye lya Benyamini, nga aama i Anasosi. Mu shibuli shino abe mulimo babaandu kimikaanda kibili ni bikana bine (24,000). 13Umuraangilisi uwe shibuli she likhumi shisharaamba mu mweesi kukuukhola likhumi, bari Maharayi, uwe lisaaye lya Zera, nga aama i Netofa. Mu shibuli shino abe mulimo babaandu kimikaanda kibili ni bikana bine (24,000). 14Umuraangilisi uwe shibuli she likhumi na shitweela nga shiraamba mu mweesi kwe likhumi na mutweela, bari Benaaya, uwe lisaaye lya Efurayimu, nga aama i Pirasoni. Mu shibuli sheewe abe mulimo babaandu kimikaanda kibili ni bikana bine (24,000). 15Umuraangilisi uwe shibuli she likhumi na bibili nga sharaamba mu mweesi kwe likhumi na kibili, bari Heliyayi uwe lisaaye lya Osiniyeli, nga aama i Netofasi. Mu shibuli sheewe abe mulimo babaandu kimikaanda kibili ni bikana bine (24,000).

Baraangirisi be bikuuka mu Isiraeli

16Luno nilwo luruungo lwe baaraangilisi be bikuuka bye ba Isiraeli: Eliyezeri umusoleeli uwa Zikuri, abe niye umuraangilisi uwe shikuuka sha Rewubeni. Shefatiya umusoleeli uwa Maka, abe niye umuraangilisi uwe shikuuka sha Simeoni. 17Hashabiya umusoleeli uwa Kemuweli, abe niye umuraangilisi uwe shikuuka she ba Levi; Zadoki nga niye umuraangilisi uwa shikuuka sha Aroni. 18Elihu, mutweela khu bandaaye ba Dawudi, abe niye uraangilila shikuuka sha Yuda; Omuri umusoleeli uwa Mikayili abe niye uraangilila shikuuka sha Isakaari. 19Mu shikuuka sha Zebuluni Ishamayiiya umusoleeli uwa Obadiya, abe niye umuraangilisi; mu shikuuka sha Nafutali, Yeremosi umusoleeli uwa Aziriyeli, abe niye umuraangilisi. 20Mu shikuuka sha Efurayimu, Hosheya umusoleeli uwa Azaziya, abe niye umuraangilisi; mu shisiintsa she shikuuka sha Manase, abe Yoweli umusoleeli uwa Pedaya, niye umuraangilisi. 21Mu shisiintsa she shikuuka sha Manase abe shishimenya mu Gileyadi, Ido umusoleeli uwa Zekariya, abe niye umuraangilisi; mu shikuuka sha Benyamini, Yasiyeli umusoleeli uwa Abuneri, abe niye umuraangilisi. 22Mu shikuuka sha Dani, Azareli umusoleeli uwa Yerohamu, abe niye umuraangilisi. Abano nibo babaaba baaraangilisi be bikuuka mu Isiraeli.

2327.23: Rak 15.5; 22.17; 26.4Umuyiinga Dawudi s’abala abo abe babaakhoolisa kimiiko kamakhumi kabili kye buukhulu ta, khulwekhuuba abe Umukasya waasuubisa ari alikhola ba Isiraeli babe baakali nga tsinieniesi tsye khwikulu. 2427.24: 2 Sam 24.15; 1 Kim 21.1-14Yowabu umusoleeli w’omukhasi Zeruya waarakikha khuubala babaandu, n’endi shonyene waalekha khumaliilisa ta. Wele waawa Isiraeli shitaambiso khulwe khuubala babaandu khuno, shaakila bibyaama mu khuubala baalekha khubirona mu shitabo sh’omuyiinga Dawudi, she bibyakholikha khaale ta.

Babaaliindatsaka bibiindu bye buyiinga

25Azamafesi umusoleeli uwa Adiyeli, abe niye uloleelela kamabiikhilo k’omuyiinga. Yonasani umusoleeli uwa Uziya, abe niye uloleelela kamabiikhilo ke mu byaalo, ke mu biriimba, ni ke mu bifwo bye khukhwikheetselamo baasiku. 26Ezuri umusoleeli uwa Kelubu, abe niye uraangilila abo babaakholatsaka kwe khulima mu mikuunda. 27Shimeyi uwaama i Rama, abe niye uloleelela kimikuunda kye kimizabibu. Zabudi uwaama i Shifimu, abe niye uloleelela bye likesa khukhwaama mu mikuunda, ni khusuuramwo ivini. 28Balahanani uwaama i Gederi, abe niye uloleelela kimisaala kimi oliva ni kimi sikamori, abe kikiili mu Shefala. Yowasi abe niye uloleelela libiikhilo lye kamafura kimisaala kimi olivu. 29Shiturayi uwaama i Sharoni, abe niye uloleelela bibyaayo byeesi baayisa mu Sharoni. Shafati umusoleeli uwa Adilayi, abe niye uloleelela bibyaayo byeesi baayisila mu matila. 30Obili umu Ishimayili, abe niye uloleelela tsiŋamila. Yehadeyiya uwaama i Meronosi, abe niye uloleelela tsisikilya tsikhasi. Yazizi uwaama i Hagiri, abe niye uloleelela tsimbusi ni kamasheese. 31Abano boosi nibo babaaloleelelatsaka bibiindu by’omuyiinga Dawudi.

Babaawaatsaka Dawudi kamakhula

32Yonasani, wandaaye uwa paapawe uwa Dawudi, abe ali umuwi uwe kamakhula. Abe ali umusaani umanyile bibiindu biikali naluundi abe ali umunamakaambila. Niye ni Yehiyeli, abe nibo babaali baleekeli be basoleeli b’omuyiinga. 33Ahisofeli naye abe umuwi uwe kamakhula isi umuyiinga, atweela ni Hushayi umu Ariki, uwaba umusaale uw’omuyiinga. 34Ahisofeli n’arurawo, Yehoyada umusoleeli uwa Benaaya ni Abiyasaari, baamwiila mu bikyele byeewe. Yowabu niye uwaba umuraangilisi uwe liiye ly’omuyiinga.