Swahili Bible2

26

Basilikhale babaaliinda khu Liisaayilo Liikhulu

1Babaaliinda khu Liisaayilo Liikhulu baakabananisibwamo mu bibuli bino, nga khukhwaama mu shikuuka sha Kora, mwabamo Meshelemiya umusoleeli uwa Kore, uwe munda iya Asafu. 2Basoleeli ba Meshelemiya nibo bano: umukiboole bari Zekariya, ukhola khabili bari Yediyayeli, ukhola khataru bari Zebadiya, ukhola khane bari Yasiniyeli. 3Ukhola kharaano bari Elamu, ukhola khasesaba bari Yehohanani, ukhola musaafu bari Eliyehonayi.

426.4: 2 Sam 6.11; 1 Kim 13.14Yabawo Obedi-Edomu, isi Wele aawa tsikhabi nga amuwa basoleeli bano, khukhwaamila khu mukiboole khukhwiikha aasi: Shemaya, Yehozabadi, Yowa, Sakari, Nesaneli, 5Amiyeli, Isakaari, ni Pelusayi. 6Shemaya umusoleeli uwa Obedi-Edomu, aaba ni basoleeli basesaba, nga buli mutweela ali umuraangilisi muuntsu iye umweene, khulwekhuuba baaba basaani baanyindaalifu naabi. 7Basoleeli ba Shemaya nibo bano: Osini, Rafaeli, ni Obedi. Babandaayaabwe Elihu ni Semakiya, abe bali basaani banyindaalifu naabi.

8Bano boosi abe be lisaaye lya Obedi-Edomu, babeene ni baalebe baabwe, nga bali babaakhola buraaambi ni kamaani. Boosi atweela abe bali kamakhumi kasesaba na babili.

9Meshelemiya abe ali ni babaana ni baalebe beewe, nga atweela bali babaandu likhumi na shinaane. 10Khukhwaama mu shikuuka sha Merari, yabayo Hosa, uwaba ni basoleeli bane. Shimuri, (isi paapa we ekesa khuuba umuraangilisi ikhaba nga s’iili niye uwaba umukiboole ta), 11ukhola khabili Hilikiya, ukhola khataru Tebaliya, ukhola khane Zekariya. Babaana ba Hosa atweela ni baalebe baabwe abe boola likhumi na bataru.

12Babaaliinda khu Lisaayilo Likhulu bano, baakabananisibwamo mu bibuli khuuloondekhana ni tsiingo tsyeesi abe baamamo, baweebwa buuraambi mu Lisaayilo, musaambo niyo ndweela nga baalebe baabwe ba Levi. 13Buli intsu iye babaandu, oba abe bali bafwiiti namwe baakali, baakikhupakho khakokha, khuukhalawo shiilibwa sheesi ili ni khuuliinda. 14Khaakokha khe khu shilibwa she bwaamanyaanga, khaarobora Shelemiya. Baakhupa khaakokha khu musoleeli weewe Zekariya, khaakokha khaamurobora khuuyila shiilibwa sh’emurwe. Zekariya yuno abe ali umusaani umulayi naabi mu khuwa kamakesi. 15Obedi-Edomu khaakokha khaamurobora khuuyila shiilibwa she bikyele; basoleeli beewe baaweebwa kwe khuliinda libiikhilo. 16Khaakokha khaarobora Shupimu ni Hosa khuuyila shiilibwa she bukwanyaanga, ni shiilibwa shilaangibwa Shalekesi shishiili khu mukhoosi kukuutsya khu musiila. Abe bayusaŋana, waabawo babaandi babaaliinda. 17Khu shilibwa she bwaamanyaanga abe babaakho basesaba buli shifukhu, khu she murwe abe babaakho bane buli shifukhu, khu sh’ebikyele abe babaakho bane buli shifukhu, ni khwibiikhilo nga baliinda babili khu babili. 18Khuuliinda khu kukhoosi kwe ibukwanyaanga, abe iliyo bane khu lukuuto, ne babili khu kukhoosi. 19Ibyo nibyo bibuli byeesi baaliindi be shikuuka sha Kora ni sha Merari bakabananisibwamo.

Buuraambi bubuundi bwe mu Lisaayilo

20Khu ba Levi, Ahiya abe niye uuli umuraangilisi uwe libiikhilo mu Lisaayilo, ni kamabiikhilo ke bibiindu bibiwaanibwayo. 21Yehiyeli, umusoleeli uwa Ladani uwe munda iya Gereshoni, abe niye araangilila intsu iyeewe umweene.

22Basoleeli ba Yehiyeli, Zesamu ni wandaaye weewe Yoweli, abe nibo babaraangilila kamabiikhilo ke mu Lisaayilo ly’Omukasya. 23Mu be lisaaye lya Amuramu, ni lya Izahari, ni lya Heburoni, ni lya Uziyeli, 24abe Shebuweli umusoleeli uwa Gereshoni, Gereshoni umusoleeli uwa Musa, niye uli umuraangilisi uwe kamabiikhilo. 25Shebuweli yuno abe ali uwe buulebe khu b’enda iya Eliyezeri, wandaaye uwa Gereshoni. Eliyezeri wasaala Rehabiya, Rehabiya wasaala Yeshayiya, Yeshayiya wasaala Yolamu, Yolamu wasaala Zikuri, Zikuri wasaala Shelomosi. 26Shelomosi yuno ni baalebe beewe abe nibo babaaliinda bye mu mabiikhilo koosi byeesi umuyiinga Dawudi, ni baaraangilisi be bikuuka, ni babaali mu maye, ni baaraangilisi be kamaye, baaba nga baabiwaanileyo isi Wele. 27Abe byeesi babaandu bayaaya khukhwaama mu busoolo, bino baabiwaanayo khuraambisibwa mu khuloleleela Lisaayilo ly’Omukasya. 28Shelomosi ni baalebe beewe nibo babaaliindatsaka biwaanwa byoosi bibyaweebwayo buraawa, nga nimwo mumuuli bibyareerebwa bano: Samweli umuŋoosi, Saulo umusoleeli uwa Kishi, Abuneri umusoleeli uwa Neri, ni Yowabu umusoleeli uwa Zeruya.

Buuraambi bwe ba Levi babaandi

29Mu be lisaaye lya Izari, Kenaniya ni basoleeli beewe nibo babaaroborebwa khuuraamba buraambi bwe bulafu, bubuukhaaba mu Lisaayilo mukari ta. Abe bali bawuli mu Isiraeli, nga nibo baaraangilisi naluundi baakayi. 30Be mu lisaaye lya Heburoni, Hashabiya ni baalebe beewe, basaani baanyindaalifu shikana shitweela ni bitoondo musaafu (1,700), baweebwa buraambi bwe khuuwula shisiintsa sha Isiraeli shishiloleleele ibukwanyaanga khuutsya kwe Yorudaani, mu bye khukhwisaaya ni mu khuuba baarume b’omuyiinga ibweene iyo.

31Be mu shikuuka sha Heburoni ba buli intsu, naluundi buli lisaaye, Yeriya niye uwaba umuraangilisi waabwe. Imbuka isi Dawudi aamalila kimiiko kamakhumi kane nga ali umuyiinga, baaweentselesa mu luruungo lwe shikuuka sha Heburoni, baanyoola nga mulimo basaani baanyindaalifu, mutweelakho nga niye Yazeri uwe Gileyadi. 32Umuyiinga Dawudi waamurobora niye ni baalebe beewe bikana bibili ni bitoondo musaafu (2,700), basaani be kamaani, naluundi nga buli mutweela araangilila muuntsu mumweewe, khuuba baawuli be ba Rewubeni, ba Gadi, ni shisiintsa she shikuuka sha Manase. Abe bali bawuli mu bye khukhwisaaya ni khuuba baarume b’omuyiinga ibweene iyo.