Swahili Bible2

23

123.1: 1 Bay 1.1-40Nga Dawudi wahangaale mu miiiko naluundi waakorire, wekyelisa Solomoni khuuba umuyiinga uwa Isiraeli.

Buuraambi bwe ba Levi

2Dawudi waabuusaasa baaraangilisi be ba Isiraeli boosi, ni basaayi ni ba Levi. 3Baabala ba Levi abe baboolisa kimiiko kye buukhulu kamakhumi kataru ni khutuumisawo, benyoola nga bali kimikaanda kitaru ni bikana shinaane (38,000). 4Dawudi waaloma ari, “Kimikaanda kibili ni bikana bine (24,000) khu bano, bali ni buraambi bwe khuloleleela Lisaayilo ly’Omukasya. Bikana bisesaba (6,000), bali ni khuuba bawuli naluundi baakayi, 5ni bikana bine (4,000), bali ni khuuba babaliinda khu shilibwa. Babaandi bikana bine (4,000), bali ni khuuruuya Umukasya nga baraambisa bibiitsila khu myeenya byeesi ise namala khaale khuukhola.”

6Dawudi waabakabananisamo mu bibuli bitaru, khuloondekhana nga babaana ba Levi ni baaba: Gereshoni, Kohasi, ni Merari.

7Basoleeli ba Gereshoni baaba: Ladani ni Shimeyi. 8Basoleeli ba Ladani baaba bataru: Yehiyeli niye umukiboole, khwelakho Zesamu, nio Yoweli. 9Basoleeli ba Shimeyi baaba bataru: Shelomosi, Haziyeli, ni Harani. Be munda iya Ladani, abe bano buli mutweela ali umuraangilisi uwe muuntsu mumweewe. 10Basooleli ba Shimeyi baaba bane: Yahasi, Zina, Yewushi, ni Beraya. 11Yahasi aba niye umukiboole, Ziza wakhola khabili. Ne Yewushi ni Beraya nibo sibaaba ni babaana baakali ta, kila nibo babalibwa nga intsu indweela mu lisaaye ilyo.

12Basoleeli ba Kohasi baaba bane: Amuramu, Izahari, Heburoni, ni Uziyeli. 1323.13: Luky 28.1Basoleeli ba Aramu baaba babili: Aroni ni Musa. Aroni areebwa buraawa khu mulimo kwe khuubita bibiindu tsikhabi nio bikyele bikhosefu. Niye atweela ni basoleeli beewe, nga bali ni khukhwoosha bubaani mu moni tsy’Omukasya, khumwakaanisa, ni khuuwatsaka babaandu tsikhabi mu lisiina lyeewe, biilo ni biilo. 14Ne basoleeli ba Musa umwakaanisi uwa Wele, baabili baababalila mu shikuuka sha Levi. 15Basoleeli ba Musa baabili nibo: Gereshoni ni Eliyezeri. 16Shebuweli abe niye umusoleeli umukhulu uwa Gereshoni. 17Eliyezeri abe ali n’umusoleeli mutweela, bari Rehabiya, ne Rehabiya yuno abe ali ni basoleeli baakali naabi.

18Mu basoleeli ba Izahari, Shelomisi abe niye umukiboole. 19Basoleeli ba Heburoni baaba nibo: Yeraya nga niye umukiboole, Amariya ukhola khabili, Yahaziyeli ukhola khataru, ni Yekameyamu ukhola khane. 20Uziyeli abe ali ni basooleli babili: Mika umukiboole, ni Ishiya ukhola khabili.

21Basoleeli ba Merari baaba: Mahili ni Musiyi. Basoleeli ba Mahili baaba; Eliyazari ni Kishi. 22Eliyazari waafwa nga s’aalikho ni basoleeli boosi ta, akhali bakhaana bonyene. Balebe baabwe babaaba basooleli ba Kishi, bayila bakhaana abo nga bakhasi baabwe. 23Basoleeli ba Musiyi baaba bataru: Mahili, Ederi, ni Yeremosi.

24Abo nibo babaaba be mu shikuuka sha Levi, nga lisaaye lye bakuuka baabwe ni lyaba, naluundi nga buli mutweela khu nibo abe ali umuraangilisi uwe muuntsu mumweewe. Tsintsu tsino tsyabamo babaandu abe baboolisa kye buukhulu kamakhumi kabili ni khuuminyisawo, abe babaanyalisa khuukhola kwe bubwakaanisi mu Lisaayilo ly’Omukasya. 25Khulwekhuuba Dawudi aaloma ari, “Umukasya Wele uwa Isiraeli, waaweele babaandu beewe lukoosi; naluundi amenya mu Yerusalemu biilo ni biilo. 2623.26: Maka 10.8Ni nashiryo ba Levi seshibekoombisa khuusuta iweema y’Omukasya ni bibiindu bibiraambisibwamo ta. 27Khuuloondekhana ni khuulakila khwa Dawudi khuno khuumaliilisi, ba Levi baboolisa kye buukhulu kamakhumi kabili ni khuuminyisawo, abe nibo babaayilibwa khuuraamba mu Lisaayilo. 2823.28: Bala 3.5-9Abe bakhola kumulimo kwe khuuyeeta basaayi be lisaaye lya Aroni, mu bwakaanisi bwe mu Lisaayilo, nga nimwo mumuuli khuuŋoona mu lwaanyi ni mu biseenge mukari, khuuliinda ibyo byoosi abe bibiili bikhosefu, ni buraambi bubuundi bwoosi bwe mu Lisaayilo lya Wele. 29Abe baŋoonaŋoona kimikaati kikiwaanibwayo isi Umukasya, buufu buunose naabi, kimikaati kikiili kimibaambali nga kamahaandu, biwaanwa bikhalaange, biwaanwa byeesi batubaasilemo kamafura ke tsinyanyi, ni bibiindu bye khupimilamo bya buli shikuuka. 30Buli kumutikhinyi naluundi buli angoloobe, bali ni khukhwiima mu Lisaayilo, khusiima naluundi khuruuya Umukasya. 31Naluundi bali ni khuukhola shino nga iliwo shiwaanwa shishooshe shoosi shishiwaanibwileyo isi Umukasya khu Sabato tsyoosi, khu biifukhu bye kumweesi kumuyaakha, ni biifukhu bikhulu. Shino ba Levi baaba bali ni khuushikhola mu moni tsy’Omukasya akhali khukhwakama ta, khuukhola nga ni shikanibwa. 32Nashiryo bali ni khuuloleleela iweema ni shiifwo shikhosefu, naluundi bali ni khuuyeeta baalebe baabwe, basoleeli ba Aroni, mu buraambi bwe khukhwakaanisa mu Lisaayilo ly’Omukasya.”