Swahili Bible2

22

1Kila Dawudi aloma ari, “Ano niwo isi Lisaayilo ly’Omukasya Wele, niwo isi lili ni khukhwombekhebwa. Ikhaba shisheeso she biwaanwa bye khukhwoosha bye ba Isiraeli, shili ni khuuba ano.”

Inengekharengekha iye khukhwombakha Liisaayilo Liikhulu

2Dawudi waarusa shilakilo ari banaambo babaamenya mu Isiraeli babusane, abawe buraambi. Batweela khu nibo baaweebwa buraambi bwe khukhwaraaka kamabaale ni khuukabeetsa, karaambisibwe mu khwombakha intsu iya Wele. 3Dawudi wawaanayo biibya biikali bye khuukholamo kimisumaari, kimilyaango, biilibwa, ni biibya bibiraambisibwa mu khuwaambisa bibiindi, ni biibya bibiindi biikali busa, bibikhanyala byaabalibwa ta. 4Aabawo ni tsimbaawo tsitsikhabalibwa ta, tsye kimisaala kimiseda, tsyeesi babaandu be mu Sidoni ni Tuulo baareerera Dawudi. 5Khulwekhuuba Dawudi aaloma ari, “Lisaayilo lyeesi bali ni khukhwombakhila Umukasya, lili ni khuuba lilimwaakhila naluundi nga lye shiriifwa, nga liruuyibwa mu shibala shoosi. Ni nashiryo kane ise ikhole tsinengekharengekha tsye khuulyombakha, khulwekhuuba Solomoni umwaana wase ashiili mukeekhe naluundi ashiili khukhwiyika bibiindu biikali ta.” Nashiryo nga Dawudi ashiili khufwa ta, waanyoowa waarawo bibikanibwa biikali bibyeene.

6Walaanga umwaana weewe Solomoni, waamukhoonyakilila khuukhwombakhila Umukasya Wele uwa Isiraeli, Lisaayilo. 722.7: 2 Sam 7.1-16; 1 Kim 17.1-14Dawudi waalomela Solomoni ari, “Mwaana wase, ise abe nakana khukhwombakhila Umukasya Wele wase Lisaayilo, khuumwiisamo shiriifwa. 8Ne Umukasya umweene waantsikaanisa ise nga aloma ari, ‘Iwe weerire babaandu baakali khulwe buusoolo bukali bweesi usoolane. Nashiryo khulwe shifuki shikali shishatsutsukha nga ise imbona, iwe singene untsombakhile ise Lisaayilo ta. 9Bona, iwe ukhasaaleyo umwaana umusiinde, uliba umuundu uwe lukoosi. Ise ikhaamuwe lukoosi, alekhe khuubakho ni baasiku babaamwibotokhelela ta. Lisina lyeewe liliiba bari Solomoni,22.9 Lisiina lino lyaama mu lomo iye Luheburaniya “Shalomu”, imanyisa “Lukoosi ni Khukhwiliinda.” khulwekhuuba mu buwuli bweewe, mu Isiraeli mulibamo lukoosi ni bye khukhwiliinda khulayi. 10Uyo niye ulintsombakhila ise Liisaayilo Liikhulu. Aliba umwaana wase, ni nase ndiba paapa weewe. Ikhaatikiye shitsoloŋo she buyiinga bweewe biilo ni biilo.’ 11Nashiryo mwaana wase, Umukasya abe ni nawe, nio unyalise khukhwombakha Lisaayilo ly’Omukasya, Wele woowo, nga umweene n’aaloma bibikhuwaamba khus’iiwe. 12Shonyene indi, khali Umukasya akhuweele iwe kamakhula ni khuumanya, nio nga weetsile khukhurawo iwe nga umuwuli wa Isiraeli, uwule nga uloondelela kamakaambila k’Omukasya, Wele woowo. 1322.13: Yos 1.6-9N’uloondelele kamakaambila ni biilakilo byeesi Umukasya aamala khuuwa ba Isiraeli nga abirira mu Musa, kane buli shitweela shikhutsiile iwe buulayi. N’uube uwe kamaani naluundi umunyindaalifu. Ukharya ta, naluundi ukheyembelela ta. 14Ise naakhakilekho khuubira mu bihangafu biikali, khuufunila Lisaayilo ly’Omukasya bibiindu bino: tsitani aambi tsitsituumisa mu mikaanda kitaru ni biikana bine (34,000) tsye zaabu, tsitani aambi tsitsituumisa mu mikaanda kitaru ni biikana bine (34,000) tsy’efeetsa, ni bibyuuma bya buroonzi bibikhanyala byaapimikha ta, khulwe buukali bwabyo. Ikhaba tsimbaawo ni kamabaale nabyo naareerewo. Nawe uli ni khuulooselakho khu byeene ibyo. 15Uli ni baraambi baakali naabi: babaarema kamabaale, babaakoombakha, baabeetsi, baboombakhi be tsisaambo tsingali babaakhabalikha ta, nga bali ni kamakhula mu khwoombakhila, 16izaabu, ifeetsa, ni buroonzi ni biibya. Yinyukha utsye urakikhe buraambi. Umukasya abe ni nawe!”

17Dawudi waalakila baaraangilisi be mu Isiraeli boosi, khuuyeetakho umwaana weewe, Solomoni. Waabaloma ari, 18“Umukasya Wele weenywe ali ni nanywe. Bona waabaweele lukoosi khu buli luwaande lwoosi. Niye uwunjeetile ise khuuwula babaandu abe babaamenya mu liloba lino, bona ari babawulila inywe n’Umukasya. 19Ari ni mwakaanise Umukasya Wele weenywe ni kumwooyo mutweela, ni buulamu bweenywe bwoosi. Ni murakikhe khukhwoombakha Lisaayilo ly’Omukasya Wele, nio munyalise khuuramo isaanduuku iye Indakaano y’Omukasya, ni bibiindu bya Wele byoosi bikhosefu bibiraambisibwa. Bino byoosi bili ni khuureebwa mu Lisaayilo lyeesi mutsya khumwoombakhila.”