Swahili Bible2

21

Dawudi abala babaandu

(2 Samweli 24.1-25)

1Sitaani wenyukha aasi khuureerera ba Isiraeli bihangafu, kila akhongelesa Dawudi khuubala babaandu. 2Nashiryo Dawudi waalomela Yowabu ni baaraangilisi be kamaye ari, “Ni mutsye mubale ba Isiraeli, khukhwaamila i Berisheba khukhwoola i Dani, mukobole mumboolele, imanye nga bukali bwaabwe ni buli.”

3Ne Yowabu waaloma ari, “Khali Umukasya akholile ba Isiraeli khukhwilooselakho kimiluundi shitoondo shitweela! Uwe Lukoosi umuyiinga, babaandu bano boosi bali baboowo. Shiina kila ukhola shishiindu nga shino, shishinareera Isiraeli kumusaango?”

4Ne umuyiinga waabona ari sheesi alomile, Yowabu ali ni khuushitsiilakho. Nashiryo Yowabu waatsya waakeenda mu Isiraeli yoosi, waabala babaandu, lwanyuma waakobola mu Yerusalemu. 5Yowabu waareerera umuyiinga buukali bwe babaandu babaabalibwa. Basaani mu Isiraeli mwoosi abe babaaba banyala khusoolana mu busoolo boolisa ifuuma ndweela ni kumweeka mutweela (1,100,000), ne mu Yuda abe boolisa kimyeeka kine ni kimikaanda musaafu (470,000). 6Ne khulwekhuuba ndi Yowabu s’akana naabi shilakilo sh’omuyiinga ta, babaandu be mu bikuuka bya Levi ni Benyamini walekha khuubabala ta.

7Wele waakhalala khu lwe shishiindu she khuubala babaandu, kila awa Isiraeli shitaambiso. 8Dawudi waalomela Wele ari, “Ise noonakile naabi khulwe shishiindu sheesi ikholile. Ne ari naakhwikoontseleele, n’untsiyakhile shishoonako shase, ise ndi umwakaanisi woowo, khulwekhuuba nakholile she busilu.”

9Kila Umukasya akanikha isi Gadi, umuŋoosi uwa Dawudi ari, 10“Tsya ulomele Dawudi uri, ‘Umukasya waalomile ari khu biindu bitaru, loondakho shitweela, sheesi anakhukhola khusi iwe.’ ” 11Kila Gadi atsya isi Dawudi amulomela ari, “Umukasya waalomile ari khu bitaru bino roborakho shoosi sheesi iwe ukana: 12oba kimiiko kitaru kye ntsala; namwe kimyeesi kitaru nga baasiku boowo bakhukubyeenga, nga bakhufuura mu busoolo; namwe biifukhu bitaru nga Umukasya akhwibwaakala iwe ni lurima, asiindikhe luufu luubi naabi mu shibala shoowo, malayika w’Omukasya atsye nga eera babaandu mu Isiraeli yoosi. Ari roborawo sheesi ise niisilayo uyo uwusiindikhile khukhwiitsa ano.”

13Dawudi waalomela Gadi ari, “Nenyoolile nga nawaambikhile. Ne shishifuura, khayo Umukasya abe niye uwumba shitaambiso, khulwekhuuba niye ali uwe shiisa, khuufuurisa babaandu ni baamba ise shitaambiso.”

14Nashiryo Umukasya waasiindikha buulwaale buubi naabi mu Isiraeli, bweera babaandu kimikaanda musaafu (70,000). 15Umukasya waasiindikha malayika weewe i Yerusalemu, khushihesa shiwewo. Ne nga abe malayika ali aambi khushihesa, Umukasya waashibona, wesonesa lwe kumutaambo kweesi aawa babaandu, kila alomela malayika ari, “Sheesi ukholile shimala, lekhelawo khuubawa shitaambiso.” Malayika abe weemikhile aambi ni lulwaanyi lwe khuuwuulilakho biilyo, lwa Orunani umu Yebusi.

16Dawudi n’enyusa tsimoni tsyeewe waabona malayika w’Omukasya nga weemikhile akari e shibala ni likulu, nga mu mukhono kweewe wawaambile lurima, waaluloseleele khu Yerusalemu. Dawudi ni baaraangilisi be babaandu, nga abe bakwaarire bikwaaro bye bukoongwe, beenamisa kimirwe kyaabwe baatiila bubweeni aasi khwiloba. 17Dawudi waalomela Umukasya ari, “Ise niye uwawa likaambila lye khuubala babaandu. Ise niye uwoonakisile nga ikhola shishoonako she kamaani. Ne kamakheese kano koonakile shiina? Mukasya, Wele wase, ise naakhwikoontseleele, n’umbe ise ni be muuntsu iya paapa wase shitaambiso, uwonise babaandu boowo khukhwaama khu buulwaale buubi buno.”

18Kila Malayika w’Omukasya alakila Gadi khuulomela Dawudi, atsye ombakhile Umukasya shisheeso she khukhwisaayilakho, khu lwaanyi lwa Orunani umu Yebusi, isi bawuulila biilyo. 19Nashiryo Dawudi waatsya, nga Gadi n’amuloma mu lisiina ly’Omukasya. 20Ari abe Orunani alikho awuula iŋaano. N’eshebukha waabona malayika, basoleeli ba Orunani abe babaali ni paapa waabwe beebisa. 21Kila Dawudi atsya isi Orunani. Orunani n’abona umuyiinga Dawudi alikho eetsa isi ali, waarura mwiwuulilo, weenamisa kumurwe, waatiila aasi bubweeni, nga esamo Dawudi lukoosi. 22Kila Dawudi alomela Orunani ari, “N’ungulise liwuulilo lyoowo lino, nombakhilekho Umukasya shisheeso she khuumwiisaayilakho, nio akile buulwaale buubi buno burure khu baandu. Kane ikhusasula kamapeesa kakaakanibwa koosi.” 23Orunani waalomela Dawudi ari, “Uwe Lukoosi umuyiinga, n’uyile liwuulilo, ukhole nga ni shikanibwa. Ise inakhuwa ni tsiyeeyi tsye khukhwoosya nga shiwaanwa, ni kimikaango kikiiwuula kane kibe tsiikhu, ikhuwe n’iŋaano iye khuuwaanayo. Byoosi inabikhuwa busa.” 24Ne umuyiinga Dawudi waalomela Orunani ari, “Sesinyalikha ta. Ise ndi khukana khubisasulila kamapeesa kameene kakaabyoola. Ise singane imaambe bibiindu bibiili bibyoowo imbilile Umukasya ta, namwe imbaaneyo shiwaanwa sheesi ikhasasuliile ta.”

25Nashiryo Dawudi waasasula Orunani kamapeesa kakoola zaabu bitoondo bisesaba (600). 26Dawudi wombakhila Umukasya shisheeso ibweene iyo, waakaanisayo biwaanwa bibyookhebwa, ni bibiireera lukoosi, nga aloomba isi Umukasya. Umukasya waamwiilamo nga asiindikha kumulilo khukhwiitsa khu sheeso nga kwaama mu ngaaki.

27Lwanyuma Umukasya waalakila malayika, ni malayika naye waakobosayo lurima mweesi balubiikha. 28Dawudi n’abona ari Umukasya waamukoboolemo sheesi akana nga n’aloombela mwiwuulilo lya Orunani umu Yebusi, luno wesaayatsakila ibweene iyo. 29Khulwekhuuba mu mbuka iyo, abe iweema y’Omukasya isi Musa aakhola abe ili mu mubiimbi, naluundi shisheeso sheesi booshatsakilakho biwaanwa abe shishiili mu shifwo shikhosefu, i Gibiyoni. 30Ne abe Dawudi s’anyala waatsyayo khukhwisaaya Umukasya ta, khulwekhuuba abe waariire lurima lwa Malayika w’Omukasya.