Swahili Bible2

19

Dawudi asoolanisa ba Amoni ni ba Siriya

(2 Samweli 10.1-19)

1Ibyo nga byaabeele biryo, lwanyuma lwayo, Nahashi umuyiinga uwe ba Amoni waafwa, umusoleeli weewe waamwiilila mu bikyele. 2Kila Dawudi aloma ari, “Kane ikholakanile atweela ni Hanuni, umusoleeli uwa Nahashi, khulwekhuuba abe paapa weewe akholakanila atweela ni nase.” Nashiryo Dawudi waasiindikha baarume khuutsya khwoola khu Hanuni nga n’afwiilwa paapa weewe. Baarume ba Dawudi baatsya isi Hanuni mu Amoni, khumusaasila khuufwa khwa paapa weewe. 3Ne baaraangilisi be ba Amoni balomela Hanuni bari, “Iwe waambaasa uri Dawudi warumanile ano babaandu lwekhuuba weesilemo paapa woowo lukoosi? Baarume beewe beetsile khuweentselesa ni khukhwimenielesa, nio bawaambe shibala shino.”

4Nashiryo Hanuni wawaamba baarume ba Dawudi waababekakho bunwaanwa, wawaamba bikwaaro byaabwe wabikhalilakho mu bikuute, wabatimisa baatsya. 5Dawudi n’awulila shino, waabona nga shili she khuuswaala naabi. Kila abasiindikhila buurume nga buloma buri, “Ni murame i Yeriko khukhwoolisa bunwaanwa bweenywe ni bulitsowa, nio mwiitse ino.”

6Umuyiinga Hanuni ni ba Amoni ni baabona bari bareerirewo buusiku akari aabwe ni Dawudi, baaliipa tsikilo kimikaanda kitaru ni bikana bine (34,000) tsye feetsa, khuupaangisa kamakaali ni basilikhale be khu ŋwaaŋwa, khukhwaama mu Mesopotamiya, ni mu Maka sye mu Siriya, ni mu Zoba. 7Bapaangisa kamakaali kimikaanda kitaru ni bikana bibili (32,000), n’umuyiinga uwa Maka ni liiye lyeewe. Abano beetsa bebuusila i Madeba. Ba Amoni babuusana khukhwaama mu biriimba byaabwe beetsa khukhwibwaakala.

8Nga Dawudi waawuliile shino, kila asiindikha Yowabu ni liiye lye basaani be kamaani. 9Ba Amoni baatsya berengekharengekhela busoolo khu shilibwa she shiriimba shaabwe shikhulu. Bayiinga babeetsa khuuyeeta, baaba bonyene busa mwirome.

10Yowabu n’abona nga baasiku bakana khumwibwaakala khukhwaama imukoongo n’ibweeni, kila aroboramo basilikhale batweela mu ba Isiraeli, waabarengekharengekha khukhwibwaakala ba Siriya. 11Babaaramire waabawaambisa wandaaye weewe, Abishayi, beerengekharengekha khukhwibwaakala ba Amoni. 12Kila alomela Abishayi ari, “N’iba bari ba Siriya baaminyile ise kamaani, iwe kane wiitse unjeete; ne n’iba bari ba Amoni baakhuminyile iwe kamaani, kane ise niitse ikhuyeete. 13N’ube umunyindaalifu! Soolana shisaani khulwe babaandu beefwe, ni khulwe biriimba bya Wele. Khayo sheesi Umukasya akana shikholikhe.”

14Nashiryo Yowabu ni basilikhale beesi aaba ni nabo besyeenda khuusoolana ni ba Siriya, ne ba Siriya baatitukha baatsya. 15Ba Amoni ni baabona bari ba Siriya baatitukhile baatsiile, nabo baatitukha baatsya bengila mu shiriimba, baalekha khukhwibwaakala Abishayi ta. Kila Yowabu elayo i Yerusalemu.

16Ne ba Siriya ni baabona bari ba Isiraeli baabafuurire mu busoolo, baarumanisa khuulaanga ba Siriya abe babaali shaangelekha we luluutsi Efurati, nga Shofaki umuraangilisi uwe liiye lya Hadadezeri niye umuraangilisi. 17Ni baaboolela Dawudi bibiindu bino, waabuusaasa atweela liiye lya Isiraeli, waakhalisa luluutsi Yorudaani, waabatsya, weerekekha khuubasoolanisa. Nga Dawudi waamalile khukhwirekekha khu basoolanisa, busoolo bwarakikha. 18Lwanyumakho ba Siriya batitukha nga belukha khukhwaama isi ba Isiraeli. Dawudi waakhoonya basilikhale ba Siriya bikana musaafu (7,000) babaatimisa kamakaali, ni kimikaanda kine (40,000) be khu bikyele busa, naluundi weera Shofaki, umuraangilisi uwe liiye. 19Liiye lya Hadadezeri ni lyabona liri lye ba Isiraeli lyabawulile, bakhola indakaano iye lukoosi ni Dawudi, kila bekyela babaakaanisi beewe. Nashiryo ba Siriya baalekha khukana khukhwiloosela khuyeeta ba Amoni luundi ta.