Swahili Bible2

18

Buusoolo bweesi Dawudi aatsya ng’afuura

(2 Samweli 8.1-18)

1Ibyo nga byaweele, umuyiinga Dawudi waasoolanisa ba Filisitiya waabafuura, waababukula shiriimba Gaasi ni bibyaalo bibishibotookheleele.

2Waasoolanisa ba Mowabu waabafuura, ba Mowabu bekela babaakanisi ba Dawudi nga bamuwa kumusolo. 3Dawudi naluundi waasoolanisa waafuura Hadadezeri umuyiinga wa Zoba, shiriimba shishiili aambi ni Hamasi. Khulwekhuuba abe Hadadezeri ali khuukhakakho khuubalaayisa buyiinga bweewe mu bisiintsa bye luluutsi Efurati. 4Dawudi wawaamba khukhwaama khu muyiinga uyo kamakaali shikana shitweela (1,000), basilikhale babaakeendela khu ŋwaaŋwa bikana musaafu (7,000), ni be khu bikyele busa kimikaanda kibili (20,000). Tsiŋwaaŋwa tsifuura buukali waatsiremakho kimikotyo waatsilemasa, khurusakho itsyo abe tsitsinyala khukhweesa kamakaali. 5Ba Siriya be Damasiko ni beetsa khuutimiilila Hadadezeri umuyiinga uwa Zoba, Dawudi weera ba Siriya kimikaanda kibili ni bikana bibili (22,000). 6Lwanyuma Dawudi waarawo tsikaambi tsye kamaye mu Siriya. Ba Siriya bekyela babaakaanisi ba Dawudi, nga bamuwa kumusolo. Umukasya waanyalisisa Dawudi khufuura busoolo buli oosi isi atsya. 7Dawudi waabukula tsingabo tsye zaabu tsyeesi abe liiye lya Hadadezeri lyasuta, waatsiyila mu Yerusalemu. 818.8: 1 Bay 7.40-47; 2 Kim 4.11-18Dawudi waatsya mu biriimba Tibahasi ni Kuno, nga bino byaba bya Hadadezeri, waasuta bibyuuma biikali naabi. Bino nibyo byeesi Solomoni aaraambisa khukhwombakha kamataangi, ni kimisiindi, ni bibiraambisibwa bibiindi bya buroonzi.

9Umuyiinga Towu uwa Hamasi n’awulila bari Dawudi waafuurire liiye lya Hadadezeri umuyiinga uwa Zoba lyoosi, 10waarumana umusoleeli weewe Hadoramu isi umuyiinga Dawudi, khuumukheesa ni khuumusiima, khulwekhuuba abe Towu umweene aasoolanatsaka ni Hadadezeri, ne Hadadezeri abe amufuuratsaka. Waakaanisa Dawudi biwaanwa bya buli shikuuka, nga mulimo izaabu, ifeetsa, ni buroonzi. 11Ni nabino nabyo, umuyiinga Dawudi waabiwaanayo isi Umukasya, atweela n’izaabu, n’ifeetsa byeesi aasuta khukhwaama mu manaambo kano: Edomu, Mowabu, Amoni, Filisitiya, ni Ameleki.

1218.12: Zab 60Abishayi umusoleeli uwa Zeruya, weera ba Edomu kumukaanda mutweela ni bikana shinaane (18,000), mu Litila lye Kumuunyu. 13Waarawo tsikaambi tsye basilikhale mu Edomu, babaandu baamwo boosi bekela babaakaanisi ba Dawudi. Umukasya waayeeta Dawudi khuuwula mu busoolo buli oosi isi aatsyatsaka.

14Dawudi waawula Isiraeli yoosi, naluundi nga araangilila babaandu beewe mu bwaŋali ni mu khubirisibwa bulaayi. 15Yowabu umusoleeli uwa Zeruya abe niye umuraangilisi we liiye, ne Yehoshafati umusoleeli uwa Ahiludi abe niye urona bibiikholikha. 16Zadoki umusoleeli uwa Ahitubu, ni Ahimeleki umusoleeli wa Abiyasaari abe nibo basaayi; ne Shafasha abe ali umuroni. 17Benaaya umusoleeli uwa Yehoyada abe niye uraangilila liiye lililiinda umuyiinga Dawudi, lye ba Keresi ni ba Pelesi. Basoleeli ba Dawudi abe nibo bali ni biifwo bye angaaki mu buwuli bw’omuyiinga.