Swahili Bible2

17

Buurume bwa Nasani isi Dawudi

(2 Samweli 7.1-17)

1Mu mbuka iyo abe umuyiinga Dawudi amenya mu lubili lweewe. Kila alomela umuŋoosi Nasani ari, “Bona ise imenya muuntsu imiliwu, ne isanduuku iye Indakaano y’Omukasya ili mu weema.” 2Nasani waalomela Dawudi ari, “Khola shishiili mu mwoyo kwoowo, khulwekhuuba Umukasya ali ni nawe.”

3Ne mu shilo sheene isho, Umukasya waalomela Nasani ari, 4“Tsya uboolele umwakaanisi wase Dawudi uri, ise Umukasya imulomela ndi, ‘S’ali iwe niye ukhaantsombakhile ise intsu isi ise ikhaamenyemo ta. 5Khulwekhuuba ise sinamenyatsakakho muuntsu khukhwaama khu shifukhu khweesi narusira ba Isiraeli mu Misiri ni khukhwoolisa ari ta, akhali ndi abe imenya mu tsiweema, naluundi nga naama mu shifwo shitweela khuutsya mu shifwo shishiindi. 6Mu bifwo byoosi byeesi ise nakeenda ni ba Isiraeli, ise naalomakho ikhaba mutweela khu baaraangilisi ba Isiraeli, isi nalakila khuuba umwaayi uwe babaandu baase ndi, shiina kila akhaantsombekhela ise intsu imiliwu?’ 7Nashiryo, kane utsye uboolele umwakaanisi wase Dawudi uri, ‘Umukasya, umweene uwe kamaye waalomile ari, ise nakhwaamisa iwe mu maayilwe, mu khwaayisa kamasheese, indi nio ube umuraangilisi we babaandu baase ba Isiraeli. 8Naluundi ise naabeelatsakile ni nawe buli oosi isi utsya. Naamalawo baasiku boowo nga wamweene ubona. Kane ise ikhwikyelise iwe ube ni khuumanyikhana khuukali, ube busa nga baaraangilisi babaamanyikhana mu shibala shoosi. 9Ise samweene ikhaarengekharengekhele babaandu baase ba Isiraeli shiifwo, mweesi ikhaabare, nio bamenye mu shifwo shishaabwe, balekhe khukhwiilamo khuutaambisibwa ta. Baasiku baabwe sibakhaabeelekho khuubataambisa nga ni baakhola amataayi ta, 10nga khukhwaama mu mbuka isi naroborera ba Isiraeli baawuli ta; naluundi ise ikhaawule baasiku baabwe boosi. Ni khufuurirakho ilala, ise Umukasya, ikhaakhuwe iwe lisaaye liikali. 11Imbuka yoowo nga yoolile wafwiile watsiile isi bakuuka boowo, indirawo mutweela khu baana boowo khuuba umuyiinga, naluundi indihandalasa buyiinga bweewe. 12Uyo niye ulintsombakhile ise intsu, ni nase ndiwandalasa buyiinga bweewe biilo ni biilo. 1317.13: 2 Kor 6.18; Heb 1.5Ise ikhaabe paapa weewe, ni naye aliba umwaana uwase. Khuukana khwase khuukali sikhukhaamururekho nga ni khwaarura khu muyiinga uwa khunyoowa iwe ta. 14Ne akhali niye indimuŋaŋasa khuuba umwaana uwase ni mu buyiinga bwase, biilo ni biilo, ni buyiinga bweewe bulibawo biilo ni biilo.’”

15Khuuloondekhana ni bilomo bino, Nasani waatsya waaboolela Dawudi.

Khuuloomba khwa Dawudi

(2 Samweli 7.18-29)

16Lwanyuma umuyiinga Dawudi wengila mu weema, wekhala aasi mu moni tsy’Omukasya, waaloma ari, “O Umukasya Wele, ise niye naanu, ikhaba be ntsu yase nibo ba naanu, kila uniinisile ise angaaki waantsoolisa ano ari? 17O Wele, ate shino shaba shishiindu shifwiiti naabi mu moni tsyoowo. Iwe wakanikhile ikhaba khu lisaaye lyase, ise umwakaanisi woowo, nga ni baliba, mu mbuka indeeyi itsya khukhwiitsa, naluundi iwe waantsikesa ise khuuba umuundu iwe shiriifwa naabi. 18Shiina shishiindi sheesi ise Dawudi umwakaanisi woowo, sheesi inyala naaloma khulwe shiriifwa sheesi iwe uweele umwakaanisi woowo? Khulwekhuuba iwe waayiimanya ise umwakaanisi woowo. 19Mukasya, khulwekhuubeela ise, naluundi khulwe khuusiima khwoowo, iwe waakholeele ise bibiindu bye angaaki bino, mu khukhola bino byoosi byaamanyikha. 20Mukasya, mbaawo ukuundi uuli nga iwe ta, naluundi khuuloondekhana ni byeesi khuwulila ni kamaru keefwe, mbaawo Wele ukuundi ta, akhali iwe wenyene. 21Linaambo shiina khu shibala liliili nga lye babaandu boowo ba Isiraeli? Linaambo shiina lyeesi Wele atsya waamusa khukhwikela babaandu babeewe? Linaambo shiina lyeesi Wele ekholelamo lisiina khulwe bibiindu bye kamaani ni bibiyangisa byeesi akhola, nga atimisa kamanaambo kakaandi, ari nio babaandu beewe beesi aamusa khukhwaama mu Misiri bamenyemo? 22Iwe wekesa ba Isiraeli khuuba babaandu boowo biilo ni biilo, naluundi iwe Mukasya, wekela Wele waabwe. 23Ni nashiryo ari, Mukasya, khayo ilomo isi iwe waloma iwaamba khu mwakaanisi woowo ni be muuntsu yeewe, ibewo biilo ni biilo, naluundi ukikhole nga n’ulomile. 24Lisiina lyoowo kane limalaatane oosi naluundi liruuyibwe biilo ni biilo, nga baloma bari, ‘Umukasya umweene uwe kamaye, Wele uwa Isiraeli, niye uliinda Isiraeli.’ Naluundi intsu iy’omwakaanisi woowo Dawudi ikhareebwewo mu moni tsyoowo. 25Khulwekhuuba Wele wase, iwe waarumburiire umwakaanisi woowo uri kane iwe wikese be intsu yase khuuba bayiinga, nashiryo nase umwakaanisi woowo ninyindaliile neetsa khuuloombela mu moni tsyoowo. 26Mukasya, iwe uli Wele, naluundi walomeele umwakaanisi woowo bibiindu biilayi. 27Ni nashiryo ari, abe iwe n’uba bari wakanile, n’uwe intsu iy’omwakaanisi woowo tsikhabi, nio anyalise khukhwiloosela mu moni tsyoowo biilo ni biilo. Khulwekhuuba Mukasya, sheesi iwe uwa tsikhabi, shiba ni tsikhabi biilo ni biilo.”