Swahili Bible2

15

Khukhwiŋoonaŋoona khuusuta isanduuku

1Dawudi weyombekhela umweene tsintsu mu shiriimba shishilaangibwa sha Dawudi. Waaŋoonaŋoonela isanduuku iya Wele shiifwo, nga akyombekhela iweema. 215.2: Maka 10.8Kila Dawudi aloma ari, “Mbaawo umuundu ukuundi khuusuta isanduuku ya Wele ta, akhali ba Levi bonyene. Khulwekhuuba Umukasya waabarobora nibo khuusuta isanduuku yeewe ni khuumwakaanisa niye biilo ni biilo.”

3Kila Dawudi alaanga ba Isiraeli boosi baatsya i Yerusalemu, khuutsya khuureera isaanduuku y’Omukasya bakire mu shifwo shayo, sheesi abe aamala khaale khuukiŋoonaŋoonela. 4Kila alaanga be lisaaye lya Aroni ni lye ba Levi. 5Be muuntsu iya Kohasi, mwaamamo Uriyeli, nga araangilila balebe beewe shitoondo shitweela ni kamakhumi kabili (120). 6Be muuntsu iya Merari, mwamamo Asayiya, nga araangilila balebe beewe bitoondo bibili ni kamakhumi kabili (220). 7Be muuntsu iya Gereshoni, mwamamo Yoweli nga araangilila balebe beewe shitoondo shitweela ni kamakhumi kataru (130). 8Be muuntsu iya Elizafani, mwamamo Shemaya, nga araangilila balebe beewe bitoondo bibili (200). 9Be muuntsu iya Heburoni, mwamamo Eliyeli, nga araangilila balebe beewe kamakhumi shinaane (80). 10Be muuntsu iya Uzeli, mwamamo Aminadabu, nga araangilila balebe beewe shitoondo shitweela ni likhumi na babili (112).

11Lwanyuma Dawudi walaanga basaayi Zadoki ni Abiyasaari, atweela ni ba Levi basesaba, nga nibo: Uriyeli, Asaya, Yoweli, Shemaya, Eliyeli, ni Aminadabu. 12Waabalomela ari, “Inywe nibo babaali baaraangilisi be muuntsu tsye baakuuka beenywe mu shikuuka sha Levi. Ni mwipyeluuse, inywe mwabeene ni baalebe beenywe, nio munyalise khuutsya khureera isanduuku y’Omukasya, Wele uwa Isiraeli, mukire mu shifwo sheesi ise imalile khaale khuukiŋoonaŋoonela. 13Khulwekhuuba shiili inywe mumwakisuta kumuluundi kumutaayi ta, shishakila Umukasya Wele weefwe waakhuwaambila ifwe lirima liikali naabi. Ifwe sikhwakhola nga abe ni syandyakhiile shikholikhe ta.”

14Nashiryo basaayi ni ba Levi bepyeeluusa, khuutsya khusuta isaanduuku y’Omukasya, Wele uwa Isiraeli. 1515.15: Luky 25.14Ba Levi baabirisiramo kimisaala, nga Musa n’alakila khuuloondekhana ni sheesi Umukasya aloma, bakisutila khu mayi kaabwe.

16Dawudi waalakila baaraangilisi be ba Levi khuurobora baalebe baabwe khuuba nga babeemba kimyeenya, nga bakhupilakho bibyuuma bye kimyeenya nga kamatuungu, biyilili, ni bibisakaya. 17Nashiryo ba Levi baarobora Hemani umwaana uwa Yoweli, n’umulebe weewe Asafu umusoleeli uwa Berekiya, ni basoleeli ba Merari, ni Esani umusoleeli uwa Kushayiya. 18Aabawo ni baalebe bano, nga babayeetakho: Zekariya, Yaziyeli, Shemiramosi, Yehiyeli, Uni, Eliyabu, Benaaya, Mayaseya, Matisiya, Elifelehu, ni Mikineya, atweela ni babaliinda khu bilibwa, Obedi-Edomu ni Yeyeli. 19Babeemba kimyeenya Hemani, Asafu ni Esani, abe bali ni khuusakayisa bye kimyeenya bye biibya. 20Zekariya, Aziyeli, Shemiramosi, Yehiyeli, Uni, Eliyabu, Maseyiya, ni Benaaya abe bali ni khuukhupa kamatuungu, nga baraangililwa ni Alamosi. 21Ne Matisiya, Elifelefu, Mikineya, Obedi-Edomu, Yeyeli, ni Azaziya abe bali ni khuukhupa biyilili, nga baraangililwa ni Sheminisi.

22Kenanaya umuraangilisi uwe ba Levi, nga abe niye n’ali umuraangilisi uwe khukhwiimba, niye uwaraangilila naluundi niye uwaleekela kimyeenya.

23Berekiya ni Elukaana baaba nibo babaaliinda khu shilibwa she sanduuku iye Indakaano. 24Basaayi Shebanaya, Yosefati, Nesaneli, Amasayi, Zekariya, Benaaya, ni Eliyazari, bali ni khuuba ibweeni w’esanduuku iya Wele nga bafuura tsikhoombi. Obedi-Edomu ni Yehaya nabo abe bali babaaliinda khu shiilibwa she isaanduuku.

Isaanduuku iy’Endakaano iyilibwa i Yerusalemu

(2 Sam 6.12-22)

25Nashiryo Dawudi ni baaraangilisi be ba Isiraeli, ni baaraangilisi be bikana kye kamaye, nga bali ni kumwikhoyo kumukali, baatsya muuntsu iya Obedi-Edomu khuusuta isanduuku iye Indakaano y’Omukasya. 26Baawaanayo tsisaayilo tsye tsiwuunwa musaafu, ni kamamiiku musaafu, khulwekhuuba Umukasya abe waabanyalisile khuusuta isaanduuku iye Indakaano y’Omukasya. 27Dawudi wakwaara ingubo nga imiliwu naabi. Ikhaba ba Levi babaasuta isanduuku nabo bakwaara baryo, ni babeemba kimyeenya, ni Kenaya umuraangilisi uwe babeemba kimyeenya. Dawudi waakwaarirakho shikwaaro shishiindi khu ngaaki nga she ingubo imiliwu naabi. 28Nashiryo ba Isiraeli boosi baareera isanduuku iye Indakaano y’Omukasya ni liyoombo liikali, nga bafuura tsikhoombi, bakhupa bibisakaya, kamatuungu ni biyilili, nga bino bitsiila khu myeenya.

29Isaanduuku iye Indakaano y’Omukasya ni yaba nga yingila mu shiriimba sha Dawudi, Mikali umukhaana uwa Saulo waalolela mwitirisa, waabona umuyiinga Dawudi nga waasangaalile naluundi nga alikho ashina kamashino. Kila mu mwoyo kweewe alekelesa Dawudi.