Swahili Bible2

14

Muungo mwa Dawudi ni lubili lweewe

(2 Samweli 5.11-16)

1Umuyiinga Hiramu uwe Tuulo waasiindikhila Dawudi baarume, waamwakaanisa kimisaala kimi seda, ni baboombakhi ni babaabeetsa kamabaale, khukhwoombakhila Dawudi lubili. 2Ari Dawudi waashimanya ari Umukasya waamureerewo niye khuuba umuyiinga uwa Isiraeli yoosi, naluundi ari buyiinga bweewe bwaniinisibwa angaaki khulwe babaandu ba Isiraeli.

3Dawudi nga ali mu Yerusalemu, waayila bakhasi babaandi, wasaala babaana babaandi basoleeli ni bakhaana. 4Babaana beesi aasaala nga ali mu Yerusalemu nibo bano: Shamuwa, Shobabu, Nasani, Solomoni, 5Ibahari, Elishu, Elapeleti, 6Noga, Nefeki, Yafiya, 7Elishama, Beyeliyada, ni Elifeleti.

Khuuwula ba Filisitiya mu busoolo

(2 Samweli 5.17-25)

8Ba Filisitiya ni baawulila bari Dawudi baamubiitile khuuba umuyiinga uwa Isiraeli yoosi, boosi baabuusana baatsya khumuweentsa. Dawudi n’ashiwulila, wenyukha waatsya khuubasoolanisa. 9Mu mbuka iyo abe ba Filisitiya batsiile boolile mu litila lye Refimu, nga balikho bakhola kwe butsoonwaaki.

10Kila Dawudi areeba Wele nga aloma ari, “Intsye nibwaakale Ba Filisitiya? Kane unjeete ise imbawule mu busoolo?”

Umukasya waamukobolamo ari, “N’utsye ubebwakale, kane ikhuyeete ubawule mu busoolo.”

11Aryo Dawudi waatsya khukhwoolisa i Baali Perazimu, isi aafuurira ba Filisitiya mu busoolo. Kila Dawudi aloma ari, “Wele waabirire mus’iise khuuwula baasiku baase mu busoolo, wafwaana busa nga kameetsi kakaasalasala.” Nashiryo shiifwo isho bashilaanga bari Baali Perazimu.14.11 Mu Luheburaniya shimanyisa shiri Umukasya niye uwula ni kamaani. 12Ba Filisitiya baantsukha ba wele baabwe abweene awo, kila Dawudi alakila baboosha.

13Ba Filisitiya indi baakobola luundi khuukhola butsoonwaaki mu litila lyatsana. 14Dawudi ni elamo khukhwireeba khu Wele, Wele waamulomela ari, “Ukhabebwakalila ano ta. Akhali tsya utalaande, ubebwakale khukhwaama khu luwaande luluundi, lululoleelele kimisaala kimibalasamu. 15Nga waawuliile luswaaki lwe khuukhuumba mu masaafu ke kimisaala, bebwakale. Khulwekhuuba ise Wele naakhwinyooyile ibweeni woowo, khuuwula liiye lye ba Filisitiya.” 16Dawudi waakhola nga Wele n’amulakila, baatsya nga bakhoonya liiye lye ba Filisitiya khukhwaamila i Gibiyoni khukhwoolisa i Gezeri. 17Lubuyi luluwaamba khu Dawudi lwaatsya buli aandu mu shibala shoosi, naluundi Umukasya waakila kamanaambo koosi kaarya Dawudi.