Swahili Bible2

12

Dawudi nga ali i Zikulaga

1Khu mbuka isi Dawudi aabeela nga ashiili i Zikulaga, nga ashiili mu khwiibisa khukhwaama khu muyiinga Saulo nga s’anyala waakeenda nga n’akana ta, aabawo basaani baanyindaalifu babaatsya baamwitubaasakho. Bano baaba nibo batweela babaamuyeetakho mu busoolo bwoosi bweesi aasoolana. 2Bano baaba be mu shikuuka sha Benyamini, nga Saulo umweene n’aba. Abe bali babaandu babaalasa buyiingo nga sebabirisa ta, ni khuumwaata kamabaale nga baraambisa ikholoto, nga baraambisa oba kumukhono kumulayi namwe kumunyeletsi. 3Umuraangilisi waabwe abe niye Ahiyezeri, khweelakho Yowasi, nga bano boombi bali basoleeli ba Shema, uwe Gibeya. Nga khulikho ni Yeziyeli ni Peleti basoleeli ba Azimavesi; Beraka, Yehu uwe Anasosi, 4Isimaya uwe Gibiyoni, nga ali umusaani umunyindaalifu mu makhumi Kataru tsana, naluundi nga niye uraangilila kamakhumi Kataru ako; Yeremiya, Yahaziyeli, Yohanani, ni Yozabadi uwe Gedera. 5Eluzayi ni Yeremosi, Beyaliya, Shemariya, Shefatiya umu Harufi, 6Elukana, Ishiya, Azareli, Yoyezeri, ni Yashobeyamu, nga bano bali be shikuuka sha Kora, 7Yowela ni Zebadiya, babaana ba Yerohamu, uwe Gedori.

Be shikuuka sha Gadi babetubaasa khu Dawudi

8Ikhaba mu shikuuka sha Gadi, mwaamamo basaani be kamaani naluundi baanyindaalifu, babetubaasa khu Dawudi mu mubiimbi isi aaba nga waabusiile liiye lyeewe. Baaba basaani babaamanya naabi khuusoolana, nga baraambisa tsingabo ni kamafumo, nga bali baarafu nga tsitalanyi. Abe ikhaba mu bikoongo, nibo baaba batima busa nga tsikhisi. Baaba nibo bano: 9Umuraangilisi waabwe bari Ezeri, Obadiya weelakho, 10Mishumana waaba ukhola khane, Yeremiya waaba ukhola kharaano, 11Atayi wakhola khasesaba, Eliyeli uwe kumusaafu, 12Yohanani waaba uwe shinaane, Elizabadi waaba uwe shisyeenda, 13Yeremiya waaba uwe likhumi, Makibanayi waaba uwe likhumi na mutweela.

14Be shikuuka sha Gadi bano baaba baaraangilisi mu maye, nga iliwo be aasi aabwe, baraangilila basilikhale shitoondo shitweela, ne babaali baakhulu nga baraangilila basilikhale shikana shitweela (1,000). 15Basaani bano nibo babaakhalisa luluutsi Yorudaani nga lwetsuule lusalasala, mu mweesi kukuunyoowa mu mwiiko, basoolanisa ni kamaani naabi abo baaba nga bali mu matila, ibwaamanyaanga ni bukwanyaanga.

Be bikuuka bya Benyamini ni Yuda babaaloonda khu Dawudi

16Batweela khu be shikuuka sha Benyamini ni sha Yuda baatsya betubaasa khu Dawudi abe isi areere liiye lyeewe. 17Dawudi waatsya khuubakaanana, kila abalomela ari, “Ni muba bari mweetsile ano khukhuunjeeta khulwe buusaale, ise naabakaaniile; ne ni muba bari mweetsile khukhuundyamo luwomelo nio baasiku baase bamaambe ise ikhaba nga mbaawo shiibi sheesi ise ikholile ta, khali Wele uwe bakuuka beefwe ashiboone, abawa inywe shitaambiso.” 18Nio lwanyuma Umwoyo w’Omukasya weekha khu Amasayi, umuraangilisi uwe kamakhumi kataru tsana, kila aloma ari,

“Dawudi, ifwe khuli baboowo.

Mwaana uwa Yese, ifwe khuli ni nawe!

Lukoosi, lukoosi lube ni nawe,

naluundi lube isi abo babaakhuyeeta iwe.

Khulwekhuuba Wele woowo niye ukhuyeeta iwe.”

Kila Dawudi abakaanila, waabakhola khuuba baaraangilisi mu maye keewe.

19Batweela khu banyindaalifu be shikuuka sha Manase baantsukha liiye lyaabwe betubaasa khu Dawudi, n’aba nga atsya ni ba Filisitiya khukhwibwaakala Saulo. Ne Dawudi ni basilikhale beewe baalekha khunyalisa khuuyeeta ba Filisitiya ta, khulwekhuuba baaraangilisi be ba Filisitiya nga ni baamala lukhobo, baaloma khu Dawudi bari, “Akhola aryo waakhuwaanayo ifwe mu makhono k’omukhulu weewe Saulo waakhuremakho ifwe kimirwe.” 20Dawudi n’aba nga akobolayo i Zikulaga, aabawo basoolani be shikuuka sha Manase babaamwitubaasakho, nga nibo bano: Adina, Yozabadi, Yediyayeli, Mikayili, Yozabadi, Elihu, ni Zilesayi. Abano abe buli mutweela ali umuraangilisi uwe kamaye shikana shitweela (1,000). 21Bano baayeeta Dawudi mu khusoolanisa abo abe babaabuya nga babebwaakala. Bano boosi baaba nga bali basaani be kamaani naluundi nga bali baanyindaalifu, naluundi nga bali baaraangilisi mu maye. 22Abe aambi buli shifukhu babaandu beetsa khukhwitubaasa khu Dawudi khuumuyeeta, khuukhwoolisa liiye ni lyaba liikali naabi, nga silibalikha ta.

23Buukali bw’abo babeetsa isi Dawudi mu Heburoni, nga bawaambile bye busoolo, khuumuyeeta bari nio ekele umuyiinga nga eela mu bikyele bya Saulo, nga Umukasya n’aloma, nibwo buno: 24Be mu shikuuka sha Yuda, nga bali ni kamafumo ni tsingabo, abe bali bikana bisesaba ni bitoondo shinaane (6,800). 25Be mu shikuuka sha Simeoni, basaani be kamaani naluundi baanyindaalifu, nga bali bikana musaafu ni shitoondo shitweela (7,100). 26Be mu shikuuka sha Levi abe bali bikana bine ni bitoondo bisesaba (4,600). 27Yehoyada nga niye uwaraangilila abo babaama mu shikuuka sha Aroni, aaba ni basilikhale bikana bitaru ni bitoondo musaafu (3,700). 28Zadoki, umusoleeli uwaba ni kamaani naluundi nga ali umunyindaalifu, ni be muuntsu iya paapa weewe, baaba baaraangilisi be kamaye nga bali 22. 29Be mu shikuuka sha Benyamini, baalebe ba Saulo, abe bali bikana bitaru (3,000). Khukhwoolisa ari, abe baakali khu bano bashiili khu luwaande lwa Saulo. 30Be mu shikuuka sha Efurayimu abe bali kimikaanda kibili ni bitoondo shinaane (20,800), nga bali basaani be kamaani naluundi banyindaalifu. Baaba nga bamanyikhana naabi mu shikuuka shaabwe. 31Khukhwaama mu shisiintsa she shikuuka sha Manase, abe bali kumukaanda mutweela ni bikana shinaane (18,000), babaaroborebwa khuutsya khwikesa Dawudi umuyiinga. 32Be shikuuka sha Isakaari, abe babaatekeela buulayi, naluundi nga baamanyile sheesi Isiraeli yaakhiile khuukhola, abe bali baaraangilisi bitoondo bibili (200), khuutubaasakho ni baalebe baabwe babaaloondelela kamakaambila kaabwe. 33Be shikuuka sha Zebuluni abe bali kimikaanda kiraano (50,000), nga babaamanyile naabi bye busoolo, naluundi nga beyikinikha. Bano abe baayiyika khuuraambisa bye busoolo bya buli saambo. 34Be shikuuka sha Nafutali, abe bali baaraangilisi be kamaye shikana shitweela (1,000), nga bali ni basilikhale baboola kimikaanda kitaru ni bikana musaafu (37,000) babaali ni tsingabo ni kamafumo. 35Be shikuuka sha Dani, abe bali kimikaanda kibili, bikana shinaane, ni bitoondo bisesaba (28,600), nga bano bali berekefu khusoolana. 36Be shikuuka sha Asheri, abe bali kimikaanda kine (40,000), nga basoolani balayi naluundi bali berekefu khusoolana. 37Be shikuuka she Rewubeni ni sha Gadi ni shisiintsa she shikuuka sha Manase, babaama shanjelekha lwe luluutsi Yorudaani, abe bali kumweeka mutweela ni kimikaanda kibili (120,000), nga boosi baasutile bye busoolo.

38Basilikhale bano boosi, nga baamala khuubaleekela bye khuusoolana, baatsya i Heburoni, nga baamalile khuukhalawo bari batsya khukhola Dawudi khuuba umuyiinga uwa Isiraeli yoosi. Musaambo niyo ndweela, ni ba Isiraeli babaaramire boosi abe nabo baakhalilewo bari Dawudi ali ni khuuba umuyiinga. 39Nashiryo baaba ibweene iyo khuumala biifukhu bitaru, nga bali mu khulya ni khuunywa, khulwekhuuba abe bashaabwe baabaŋoonaŋoonele. 40Ikhaba ba Isiraeli abe babaali aleeyi, nga khukhwaama mu Isakaari, mu Zebuluni ni mu Nafutali, nabo beetsa nga bareera bibiindu. Baareera biilyo nga baabisutiile khu sikilya, tsiŋamiya, tsinyuumbu, ni tsiyeeyi. Bino byabamo buufu bweesi baanosa naabi, bibyaama khu kuusaala kufigi, bisusutsu bye kimisabibu, iviini, ni kamafura ke tsinyanyi. Baareera ni tsiyeeyi ni kamasheese kamakali naabi, khulwekhuuba abe iliwo kumwikhoyo kumukali naabi mu Isiraeli.