Swahili Bible2

11

Dawudi ekela umuyiinga uwa Isiraeli

1Lwanyuma ba Isiraeli boosi baabuusana, baatsya i Heburoni isi Dawudi, baamuloma bari, “Bona, ifwe khuli baalebe boowo babeene. 2Amataayiko nga Saulo ashiili umuyiinga, abe iwe niye uraangilila ba Isiraeli khuutsya mu busoolo. Umukasya Wele woowo waakhulomela iwe ari, ‘Iwe niye ukhaaraangirire babaandu baase naluundi iwe niye uliba umuwuli waabwe.’ ” 3Nashiryo baaraangilisi be ba Isiraeli boosi baatsya i Heburoni isi umuyiinga Dawudi. Dawudi waakhola ni nabo indakaano mu moni tsy’Omukasya. Kila bamuwakha kamafura kakaamubiita waaba umuyiinga uwa Isiraeli, shaba nga Umukasya n’ashiloma nga abirira mu muŋoosi Samweli.

Dawudi awaamba shiriimba Yerusalemu

411.4: Yos 15.63; Baak 1.21Dawudi waaraangilila ba Isiraeli boosi baatsya bebwaakala shiriimba Yerusalemu. Mu mbuka iyo abe bashilaanga bari Yebusi, nga ba Yebusi, abe nibo babaamenya mu liloba ilyo, nibo abe babaashimenyamo. 5Kila babekhali be mu Yebusi balomela Dawudi bari, “S’ukane wingile mu shiriimba muno ta.” Ne shitweela busa Dawudi wawaamba shiriimba sha Sayuuni, sheesi baaba batseeta ni kamaani, shekela Shiriimba sha Dawudi. 6Dawudi waaloma ari, “Umusilikhale ukane anyoowe khukhwiira ba Yebusi, kane abe niye umukhulu naluundi umuraangilisi uwe liiye lyase.” Kila Yowabu umusooleli uwa Zeruya waaba niye uwanyoowa khukhwibwaakala, niye wekela umuraangilisi uwe liiye. 7Dawudi waatsya waamenya mu lumako ulwo; nashiryo shalaangibwa shiri shiriimba sha Dawudi. 8Wombakha shiriimba isho bushaakha khu mbeka tsyoosi, khuurakikhila mu shifwo shishibamo liloba khulwe khukhwiliinda, nga shilaangibwa shiri Milo. Yowabu wombekha bushaakha bisiintsa bibiramire bye shiriimba. 9Dawudi waatsya nga eloosela busa kamaani, khulwekhuuba Umukasya uwe kamaani, abe ali ni naye.

Basaani ba Dawudi baanyiindalifu

(2 Samweli 23.8-39)

10Bano nibo babaaba basaani baakhulu, be kamaani, baanyiindalifu beesi Dawudi aaba ni nabo. Bano nibo babaamuwa kamaani mu buyiinga bweewe, atweela ni ba Isiraeli boosi, waakila baamwikesa niye khuuba umuyiinga, khuuloondekhana ni lomo y’Omukasya iwaamba khu Isiraeli. 11Basaani be kamaani beesi Dawudi aaba ni nabo nibo bano: Yesobeyamu, nga ali Umuhakimoni, niye uwaba umuraangilisi we Baataru. Shifukhu shitweela waabukula lifumo lyeewe waasoolanisa basaani bitoondo bitaru, waabeera boosi.

12Mu Bataru bano be kamaani, umuloondelakho abe bari Eliyazari, umusooleli uwa Dodo, uwaba umu Ahohi. 13Oyuno aaba ni Dawudi i Pasidamimu, lweesi ba Filisitiya baabuusanila khuubebwakala. Yaba baakholile luwomelo baabebuliile mu mikuunda kya sayiri, kila ba Isiraeli batitukha beelayo iwaabwe. 14Ne Eliyazari ni basoolani beewe beema mu mukuunda akari, baakutseeta, kila beera ba Filisitiya. Khu shifukhu isho Umukasya waabayeeta baafuura busoolo bwe kamaani.

15Lutweela Baataru tsana nga nibo baaraangilisi be kamakhumi kataru beekha, baatsya mu lifuluma lye Adulamu, isi abe Dawudi ali. Abe liiye lye ba Filisitiya lyaabuusaniile mu Litila lye Refayimu. 16Mu mbuka iyo Dawudi aaba nga ali mu kumako kwe kamaani, ne nga ba Filisitiya kamaye bakabuusiile i Beselehemu. 17Kila Dawudi aloma ni khukhwikoomba khuukali ari, “Abe uri ikhabawo umuundu ukhureerera kameetsi ke khuunywa khukhwaama mu luutsi lwe Beselehemu, luluuli aambi ni shilibwa ku!” 18Kila baselikhale baanyindalifu tsana Bataru baahatuna khuubirira mu kaambi iye ba Filisitiya, baataha kameetsi khukhwaama mu sebele iye Beselehemu abe iili aambi ni shilibwa, baakayilila Dawudi. Ne Dawudi waalekha khukanywa ta, waakatsukha aasi nga shishiwaanibwayo isi Umukasya. 19Kila aloma ari, “Wele wase khali s’afukiilisile ise inywa kameetsi kano ta, khulwekhuuba shili busa nga khuunywa kamafuki ke basaani bano babewaanileyo buulamu bwaabwe khuutsya khuukareera.” Ni nashiryo waalekha khukanywa ta. Bino nibyo bibiindu bye bunyindaalifu byeesi basaani Bataru bano be kamaani baakhola.

20Ari, Abishayi waandaaye uwa Yowabu abe niye umuraangilisi we “Kamakhumi Kataru babaafumisibwa naabi.” Lutweela aawaamba lifumo lyeewe waasoolanisa naluundi weera basaani bitoondo bitaru (300), kila khu Makhumi Kataru niye aafumisibwa naabi. 21Khu Makhumi Kataru abo, abe niye ali uwaamanyikhana naabi, khuuminyisa babaaramire boosi. Niye wekela umuraangilisi waabwe, ne waalekha khumanyikhana naabi khufuura Bataru babanyoowa ta.

22Benaaya umwaana uwa Yehoyada uwe Kabuzeli, abe naye ali umusaani umunyindaalifu, nga akhola bikholwa bye kamaani. Lutweela weera ba Mowabu be kamaani babili. Luluundi mu biseela bye bunyifu, ekha aasi mu lilowo weera italanyi. 23Naluundi weera umu Misiri, nga ali umusaani umuleeyi, nga buuleeyi olesa tsifuuti musaafu. Umu Misiri abe wawaambile ingabo mu mukhono kweewe, ne Benaaya waamutsya n’imiimbo yonyene, waayuula lifumo khukhwaama mu mukhono kw’Omumisiri, waamuwunila lilyeene, waamwiira. 24Bino nibyo byeesi Benaaya umwaana uwa Yehoyada aakhola, waakila byaamufunila lubuuyi mu be kamaani Baataru tsana. 25Waaba nga ali uwe shiriifwa naabi mu basaani bano kamakhumi kataru, ne shitweela busa waalekha khukhwoolelela Baataru abo ta. Dawudi waamwikesa khuuba umuraangilisi uwe baaliindi beewe.

26Basaani be mu maye babaaba be kamaani nibo bano: Asaheli wandaaye uwa Yowabu, Elihanani umwaana uwa Dodo uwe Beselehemu. 27Shamoti uwe Harodi, ni Helesi uwe Peloni, 28Ira umwaana uwa Ikeshi uwe Tekowa, Abiyezeri uwe Anasosi, 29Sibekayi umu Husha, Alayi uwaama i Ahohi, 30Maharayi uwe Netofa, Heledi umwaana uwa Baana uwe Netofa. 31Isayi umwaana uwa Ribayi uwe Gibeya uwe shikuuka sha Benyamini, Benaaya uwe Pirasoni, 32Hurayi uwe khuntsitsi tsye Gaasi, Abiyeli umu Arabasi, 33Azimavesi uwe Baharumu, Eliyaba uwe Shaliboni, 34Hashemu umu Gizoni, Yonasani umusoleeli uwa Shage umu Harari, 35Ahiyamu umusoleeli uwa Sakari umu Harari, Elifali umwaana uwa Uri. 36Heferi umu Mekerasi, Ahiya umu Peloni, 37Heziro umu Karumeli, Narayi umwaana uwa Ezibayi, 38Yoweli wandaaye uwa Nasani, Mibihari umusoleeli uwa Hagiri, 39Zeleki umu Amoni, Naharayi uwe Berosi, nga niye uwasutatsaka bye busoolo bya Yowabu, umusoleeli uwa Zeruya, 40Ira umu Isiri, Garebu umu Isiri, 41Uriya umu Hiti, Zabadi umusoleeli uwa Ahilayi, 42Adina umusoleeli uwa Shiza uwe mu shikuuka sha Rewubeni, atweela ni babaandi kamakhumi kataru. 43Hanani umusoleeli uwa Maka, ni Yosefati umu Misi, 44Uziya umu Ashitarosi, Shama ni Yeyile basoleeli ba Hosamu umu Aroweri, 45Yediyayeli umusoleeli uwa Shimuri, ni wandaaye weewe Yoha, nga bali ba Tizi. 46Eliyeli umu Mahavi, ni Yeribayi, ni Yoshaviya, basoleeli ba Elinamu, ni Isuma umu Mowabu, 47Eliyeli, ni Obedi, ni Yayaseli umu Mezoba.