Swahili Bible2

10

Khuufwa khwa Saulo ni babaana beewe

1Ba Filisitiya baasoolana ni ba Isiraeli, ne ba Isiraeli baatima baarura mu busoolo, shaakila ba Isiraeli baakali beeribwira khu lukiingi lwe Gilubowa. 2Ba Filisitiya baafuura Saulo ni babaana beewe. Kila beera Yonasani, Abinadabu, ni Malikisuwa, nga boosi bali babaana ba Saulo. 3Buusoolo bweengilila naabi Saulo, kila babaalasa buyiingo baamubona, baamulasa buyiingo, waatsiinisibwa naabi. 4Kila Saulo alomela uyo abe umusutila bye busoolo ari, “Bukula lurima lwoowo untsikube, untsire. Khulwekhuuba singana babaakheengila imbalu abo khukhwiitsa ano baswaatse ise ta.” Ne uyo uwasutatsaka bye busoolo bya Saulo walekha khushikhola ta, nga wariire naabi. Nashiryo Saulo umweene waabukula lurima lweewe waalwisikikhakho. 5Uyo uwasutatsaka bye busoolo n’abona nga Saulo waafwiile, naye weesikikha khu lurima lweewe, naye waafwa.

6Nashiryo Saulo waafwa, atweela ni babaana beewe bataru, ni be muungo mweewe boosi. 7Basilikhale be ba Isiraeli babaaba mu litila ni baabona bari liiye lyaabwe lyaatitukhile, naluundi bari Saulo ni babaana beewe baafwiile, baryo baantsukha biriimba byaabwe, baatitukha baatsya. Lwanyuma ba Filisitiya baatsya baabimenyamo.

8Khu shifukhu shisheelakho, ba Filisitiya ni baatsya khufuula kimilaambo kye babeeriibwile, baanyoola kumulaambo kwa Saulo ni kye babaana beewe nga kyaakwiile khu lukiingi Gilubowa. 9Kila bafuula Saulo, baamuremakho ni kumurwe baakuyila, atweela ni bye busoolo byeewe. Kila basiindikha baarume mu Filisitiya mwoosi khuuyila kamakhuuwa ako isi babaandu boosi, ni isi ba wele abe beesi besaaya. 10Kila bawaamba bye busoolo byeewe, baabira mu namwiima uwa wele waabwe, baasuunga kumurwe kweewe mu namwiima uwa Dagoni, wele waabwe.

11Babekhali be mu Yabeshi Gileyadi ni baawulila sheesi ba Filisitiya baakhola khu Saulo, 12basaani baanyindaalifu boosi benyukha aasi, baatsya baabukula kumulaambo kwa Saulo ni kye babaana beewe, baakiyila mu Yabeshi. Kila bakisiikha mu Yabeshi aasi we kuusaala kumuruumba, lwanyuma baabuya intsala khuumala biifukhu musaafu. 1310.13 a 1 Sam 13.8-14; 15.1-24; b: Lev 19.31; 20.6; 1 Sam 28.7,8Nashiryo Saulo waafwa khulwekhuulekha khuuba umwiyikinwa ta; s’aba umwiyikinwa isi Umukasya mu khuuloondelela kamakaambila keewe ta. Naluundi aatsya wereeba khu muundu ulakula, nga aweentsa kamakhula, 14mushifwo she khukhwireeba isi Umukasya. Ni nashiryo Umukasya waakila Saulo waafwa, waabukula buyiinga waabuwa Dawudi, umwaana uwa Yese.