60
Kwac a lwak ame okwor olooo
(Neŋ daŋ Jabuli 108.6-13)
Baŋ adwoŋ wer. Man wer ame Daudi me pwonyo jo. En owero i kare ame Daudi olwenyo i jo Aramnakaraim kede dok i jo Aram-joba i kare ame Joab odwogo cen te bino neko jo Edom tutumia apar wie aryo i luŋ me Kado.
160.1: 2 Cam. 8.13; 1 Tek. 18.12Ama Obaŋa, ikwerowa doŋ oko, dok daŋ iloowa,
akemo onwoŋo omaki i komwa, dwokwa i ciŋi ba, Ama Rwot.
2Imio lobo oyeŋere, imio obarre oko;
yik kan ame obarre oko, pien mito rette oko.
3Imio joni oneno cannogo apek meicel;
imiowa omato koŋo olok ame obalo wiwa oko.
4Yin doŋ iŋabo bendera malo pi jo ame wori,
me larogi i lak atero ame obao.
5Me wek joni ame imaro larre,
miwa oloo lweny i tekoni, dok igam daŋ dogwa.
6Obaŋa okobo kop i kabedo mere acil ni,
“Abino poko Cekem oko i twon kwogo me loc,
abino daŋ poko luŋ me Cukot.
7Gilead obedo mega, Manace daŋ mega;
Epraim obedo tok nyonyo me geŋo wia,
aco Juda te bedo abiro me locca.
8Ento Moab obedo becen me lwokka;
abolo warona i kom Edom me nyuto ni aloc;
abino redo redo me loc i wi jo Piriciti,”
9Ŋa abino kela i boma ame ocelo i cel atek?
Ŋa abino tella yo me wot i Edom?
10Yin mom ikwerowa oko, Ama Obaŋa?
Nen yin mom doŋ iwoto karacel i monywa.
11Tim ber ikonywa me lweny i kom okworwa,
pien kony ame dano en amio mom konyo ginnoro,
12Ka Obaŋa obedo lweny karacel kedwa, wan obino loyo,
en gire ame bino nyono okworwa dio piny.