52
Kwac me pwonyo dano ame wakere nononono
Baŋ adwoŋ wer: Man wer ame Daudi owero i kare ame Doeg, ame obedo dano me Edom obino baŋ Caulo te kobbe ni, “Daudi doŋ obino, tye i ot Akimeleki.”
152.1: 1 Cam. 22.9-10Yin twon lo atek meicel i lweny, piŋo kara iwakere
pi gin arac ame itimo i kom jo ame ŋeo Obaŋa?
Yin ibedo poro kop me neko ka jo ceŋ iyul.
2Lebi bit calo lyedi,
ticci obedo me kobo kop erupe.
3Imaro gin arac ame kato gin aber,
kede kobo goba ame kato kobo kop ateni.
4Imaro kobo kop ame kelo can,
yin lel ame maro kobo goba.
5Ento Obaŋa bino rwobi oko atwal,
en bino maki te wayi oko i kemani,
bino puto lwiti oko i lobo a jo akwo.
6Jo akitegi atira bino neno, lworo te makogioko,
obino nyere kun okobo ni,
7“Neno dano a mom mito miyo Obaŋa bedo ka-lare mere,
ento lunyo geŋo lim ame bup i ciŋe,
kun geŋo ni limmere en ame bino larre.”
8Ento an acalo yat jeituni ame doŋo i ot Obaŋa,
ageno gira mar Obaŋa a mom lokere kare luŋ me kwona.
9Abino pwoyi nakanaka, Ama Obaŋa,
pien man obedo ticci.
Abino rabo nyiŋi pien ber,
i nyim jo ame ŋeo Obaŋa.