12
Jeremia okok baŋ Rwot, eka Rwot te winyo koko mere
1Ama Rwot, an akelo kokona i nyimi,
anwoŋo ni yin gire kiteni atira,
an gira myero apid koppa i nyimi.
Kara piŋo jo areco bedo aber kun daŋ olony?
kara piŋo daŋ wegi erupe cobo tiyo gin ame cunygi mito timo?
2Yin en a yam ipito, eka lwitgi te cako donyo piny;
odono te nyako nyiggi,
Kare luŋ gin okobo kop aber komi,
cite mom oparo piri i cunygi.
3Cite yin Rwot gire iŋea aber,
yin inena dok daŋ itemo kite ame cunya tye kede i komi.
Waagi acalo romo ame atero me aneka,
ketgi kengi me kuro nino me nekogi.
4Lobowa bino bedo kumo pi kare a rom mene,
kun lum iye luŋ otwo oko?
Pien jo ame bedo i lobowa tye ka timo ka gin arac,
omio leyi kede winy tye ka to oko,
pien jo tye ka kobo ni,
“En gire mom nenowa i kan ame wan obedo iye ducu.”
5Rwot okobo ni,
“Jeremia we, ka ce iol oko i ŋwec kun i pyem icano,
kara doŋ ŋwec pyem aguragura kono,
ibino pyem iye niŋo?
Ka ce irette piny i lobo ame kuc tye iye,
kara doŋ ibino bedo nine i yen ame oculle acula ame tye i dog kulo me Jordan?
6Pien kadi omegoni ame gin jo me ot a pappi ikokome,
gin daŋ otye ka timo tim me erupe i komi,
gin daŋ otye ka kok atek me lweny kedi.
Yin myero kur igen kopgi,
kadi bed okobbi kop aber rom mene.”
7Rwot Obaŋa okobo ni,
“An doŋ atyeko weko oda oko,
atyeko doŋ kwero jona ame yam ayero ni bed mega,
An doŋ awiro marra oko,
amiogi i cin okworgi.
8Jona ame ayero me bedo mega olokere oko i koma,
calo eŋatu ame tye i buŋ,
omor doŋ amora i koko i koma,
mannono omio an daŋ adagogi.
9Mom doŋ jona-nono i tuŋ baŋa calo itukere.
Mom winy wadgi lweny kede kare luŋ?
Wot icok leyi me tim luŋ,
kelgi me obin oribere i cam karacel.
10Okwat apol apola obalo poto olokka oko,
onyonyono dul lobo ame opokka i tyengi,
omio doŋ dul lobona ame opokka ame onwoŋo yomoro cunya,
odoko doŋ tim aler alera,
11Gin doŋ omio odoŋ yie nono,
odoko doŋ tim ame cona acona.
Kabedo ducu iye doŋ tye nono,
cite mom tye dano moro ame paro.
12Tur luŋ ame tye i tim,
otyek piny doŋ obino oko i komgi,
pien pala me lweny a Rwot jwero odoco,
cakere i but lobo tuŋcel tuno kede tuŋ ocele,
mom tye ginnoro akwo ame tye i kuc,
13Gin ocoo bel, okuto en ame te luŋyo nyak,
obedo tiyo tic atek kun ool atek,
cite mom onwoŋo ginnoro iye.
Lewic bino makogi i gin ame ocek i pottigi,
pi akemo ager ame onwoŋo omako Rwot.”
Gin ame Rwot ocikere me timo i kom jo i get Icrael
14Rwot okobo kop i kom otim tim areco luŋ ame bedo i ŋet jo mere Icrael ame tye ka balo lobo ame onwoŋo emio baŋ jo mere, ni, “Nen ba, abino kwanyogi oko i lobo a jona Icrael, dok abino kwanyo jo Juda oko ak inagi. 15Kare ame doŋ atyeko kwanyogi oko, kica dok bino maka i komgi ate dwokogi i lobogi kun ŋat acel acel dok i lobo ame rik opokke. 16Dok icennere ka kare oromo ame gin doŋ opwonyo kite a jona kun okwoŋo kede nyiŋa ni, ‘Kite ame Rwot tye kede kwo-ni’, i kite ame rik opwonyo kede jona me kwoŋ i nyiŋ Baal, gin bino rubere oko i jona ote doko atek i akinagi. 17Cite ka rokkoro i akinagi mom bino winyo koppa, abino kwanyo rokkono oko i akinagi ate tyeko oko ducu, man kop ame Rwot okobo.”