16
Jerucalem obedo boma ame mom genne
1Rwot dok te kop keda, kun kobo ni, 2“Wot a dano we, myero imi Jerucalem ŋe ginnoro luŋ me kwer ame en obedo timo. 3Kobbe kop man ame Rwot Obaŋa okobo: Yin yam onywali i lobo me Kanan, kwaroni obedo dano me Amor, eka tatti te bedo nyako me Kitti, 4Aco kop i kom nywalli, i nino ame rik onywali iye, rik mom obin oŋolo peni, mom daŋ olwoko komi kede pii me komi bed acil, dok mom daŋ owiro komi kede kado, mom daŋ oboo komi kede boŋo. 5Mom tye ŋattoro kadi acel ame kica omako i komi me timo jami magi luŋ i komi, rik ote bolli kom abola i dye bar i nino ame onywali iye-nono, pien mar onwoŋo nok meicel i komi.
6“I kare ame akato i ŋeti, ate neno remo ame onywali kede omwono komi oko, an ate kobbi i kare ame remo pwod tye i komi-nono ni, 7‘Bed kwo, doki idoŋ calo yat ame tye i dye bar.’ Rik daŋ ite doŋo, acalo twon yattoro abor meicel ite doko nyako adwoŋ; tunoni te cako poŋ, yer wii daŋ te cako lot, cite komi onwoŋo tye nono aboŋo boŋo moro iye.
8“Kare ame dok abeo i ŋeti, aneni, ate nwoŋo ni doŋ iteggo oko ame iromo amara; an ate yaro boŋona ame onwoŋo atye kede, ate wumo kede komi. Ateteni, an rik ate cikere kedi, yin ite doko mega, kun acikere atek ni abino mari.” Man kop ame Rwot Obaŋa okobo.
9“An rik ate lwoko komi oko kede pii naka remo ame onwoŋo tye i komi, eka ate wiro komi kede moo. 10Alwako i komi twon boŋo moro abor ame odeo aber meicel, ate miyi daŋ amuk ame okwoo aber meicel, kede boŋo camanini me boyo wii, karacel kede boŋo me wumereni. 11Ate miyi daŋ ruko ruk me kwogo, arwako atem i ciŋi kede nyor i ŋuti. 12Ate rwako daŋ atem me um i umi, kede me yit daŋ i yiti ryoryo, ate miyi tok kwogo aber meicel. 13Mannono en kite ame yam ami irukere kede ruk me jabu kede ryal, boŋo ame iruko onwoŋo boŋo camanini aber odoco, kede aliri, karacel kede boŋo ame odeo aber meicel. Ibedo camo kwon ame omyeno i moko apwot meicel, kede moo kic, karacel kede moo yao. Idoŋo ame inen amwonya meicel, naka ite doko acalo abaka a dako. 14Berri onwoŋo owinyere meicel i akina rok apapat. Kwogo ame aketo i komi omio onwoŋo inen amwonya meicel.” Man kop ame Rwot Obaŋa okobo.
15“Cite yin ibedo geno berri, ite cako timo abor i jo luŋ ame beo i kan ame yin itye iye. 16Ikwanyo boŋŋini mogo ite gero i udi me woro jogi, ite kwogo komgi aber meicel, yin doŋ ite miye oko baŋ jo ducu, kun itimo kedgi abor calo alaya. Kodi gin ame ibedo timo-nono yam mom ru onen dok daŋ mom bino nen atwal. 17Ikwanyo daŋ jamini mogo ame otio kede jabu kede ryal ame onwoŋo amii, ite tiyo i cal dano, eka ite cako timo kedgi tim me cot. 18Ikwanyo boŋŋi mogo ame okwogo abeco meicel, ite wumogi kede, ite cako yalogi kede moona kede odok a ŋwece kur. 19Dok cam ame yam ami, ame icamo kwon ame moko okwonnere pwot meicel, moo yao kede moo kic, ento yin dok ite cako yalo kede jogi acalo gin a ŋwece kur me yomoro cunye.” Man kop ame Rwot Obaŋa okobo.
20“Yin dok ite kwanyo awobeni kede anyirani, ame inywalo baŋa, ite wot miyogi acalo mot baŋ jogi. Yin onwoŋo itamo ni timmi me aborrono obedo ginnoro atitidi meicel baŋa? 21Mannono en omio yin ibedo neko itinona, eka ite miyo waŋogi i mac me yalo jogi? 22I timmoro luŋ me kwer ame ibedo timo, kede i tim me abor ame ibedo timo, wi mom opo pi kare me tinoni, kare ame rik komi tye nono aboŋo boŋo moro, kun remo ame onywali kede daŋ omwonne amwona i komi.”
Jerucalem obedo acalo alaya
23Rwot Obaŋa okobo ni, “Ibino neno can nadi! Ibino neno can nadi! I kare ame doŋ ityeko timo tim magi luŋ, 24igero ici kani piri keni, dok igero kabedo mogo me woro cal jogi i ŋet yo. 25Kabedo luŋ ame otiŋere i ŋet yo, yin igero iye kabedo kan ame itwero nyuto iye berri acalo alaya. Imio jo luŋ ame beo kan ame yin itye iye-nono buto kedi, mannono omio imio tim me alayani onya omedde meicel. 26Dok daŋ ibedo timo tim me alaya karacel i jo Miciri ame gin obedo owoteni ame waŋgi tar, imio timmi me alaya onya omedde ameda kun iroka kede me akemo maka, 27Pi mannono nen ba, aryeyo ciŋa doŋ i komi me keto can i komi, dok daŋ abino kwanyo gummi mogo oko ame yam ami, ate miyi i ciŋ okworri ame owor ame gin jo me Piriciti, ame gin obedo jo ame dagi meicel, pien tim me abor ame ibedo timo mio lewic makogi meicel. 28Dok daŋ itimo tim me abor i jo Acuria, pien nen calo en ame ibedo timo i jo ocele ni mom ru oromi. 29Imio timmi me alaya onya omedde meicel, omio i timo naka ocatwil ame bedo i lobo a jo Kaldaya; kadi bed amannono, tim me alaya ame itimo kedgi gire mom ru oromi.”
30Rwot Obaŋa okobo ni, “Mar doŋ omio cunyi odoko agoro oko, pien aneno ni tim ame ibedo timo doŋ, itimo aboŋo lewic kadi acel. 31Nen doŋ igero icika i ŋet yo luŋ kun igero-gu i kabedo mogo ame otiŋere malo, ame tye i ŋet yo ducu. Cite yin onwoŋo mom i bedo acalo alaya, pien onwoŋo mom itimo tim me abor pi mito lim. 32Yin i dako ame alaya, pien icodo cot baŋ rok ocele ame gin wele, akaka cobo mitti wun i cwari. 33Co mio mot baŋ mon ame olaya, cite yin megi, yin en ame dok ilunyo miyo mot baŋ cogi, me wilogi me obin baŋi i kabedo ducu, i caa moro keken. 34Mannono omio yin dok ipat apata i mon ame olaya. Mom tye ŋattoro ame onwoŋo odi me bedo alaya. Mom daŋ oculli ginnoro me bedo alaya, cite yin en ame dok ilunyo culo cogi ame miti, mannono omio yin dok kiti pat meicel, i timmi me alaya-nono.
Kop ame Obaŋa oŋolo ikom Jerucalem
35“Doŋ pi mannono ba, yin alaya, winy koŋ kop ame Rwot tye ka kobo.” 36Rwot Obaŋa okobo ni, “Pien yin onwoŋo igonyo boŋo i komi me mon oko ite doŋ onoro i timi me alaya i nyim cogi ame mari, kede dok pi timmi luŋ me woro cal jogi, kede pi remo itinoni ame yin iyalo i cal jogi, mannono omio abino coko cogi luŋ ame mari, ame yam ibedo bedo kedgi i yomcuny; jo luŋ ame onwoŋo imaro kede jo ame onwoŋo idago. 37Abino cokogi i kabedo ducu gin luŋ ote bino gurri dyere, an ate yabo boŋo i komi me mon oko i nyimgi, me oneni odoco onoro ame dul komi moro me lewic mom odoŋ. 38Abino ŋolo kop i komi, kite ame aŋolo kede kop i kom mon ame pokere oko i coggi dok daŋ ote neko dano. Abino ŋolo kop i komi i twon akemo meicel, kun nyeko ocira oko, eka ite to oko. 39Abino miyi i ciŋ coggi ame onwoŋo mari, gin bino coro icika ni reto oko piny dok daŋ obino mumuko kabedo luŋ ame otiŋere malo, ame yam igero me woro cal jogi, gin bino gonyo boŋo oko i komi, ote mayo jamini mogo me wel daŋ oko i baŋi, eka ote weki doŋ onoro aboŋo boŋo moro i komi.
40“Gin bino kelo mony me bino lweny i komi, ote cecelo yin kede kiddi, ote daŋ ŋiŋido yin atitino i pala me lweny. 41Abino waŋo wudini oko kede mac, abino miyo kop ame aŋolo i komi cobere i nyim lwak mon apipim, abino miyo ijuko timmi me alaya oko, miyo mot baŋ cogi ame mari daŋ te gik oko. 42Mannono en kite ame abino cobo kede akemona i komi, eka nyeko ame atye kede i komi te doŋ ya oko. Abino doŋ bedo amwol kun akemo mom dok maka i komi atwal. 43Pien yin mom ibedo po gin ame otimere i komi i kare me tinoni, dok imio akemo obedo maka i tim magi luŋ ame ibedo timo; pi mannono, nen ba, abino culo kwor i komi pi gin ame itimo ducu, Man kop ame Rwot Obaŋa okobo.
Nyako cal i tottere, imat daŋ cal i nyare
“Mom ibedo timo tim me tarwaŋ, kun imedo i kom timmi ocele luŋ me kwer? 44Nen ba, jo luŋ ame kobo kop me carokop, bino kobo carokop man i komi, kun okobo ni, ‘Nyako cal i tottere imat daŋ cal i nyare.’ 45Yin ibedo nyako ame totti i kome en ame onywali. En totti-nono onwoŋo okwero cware karacel itino mere luŋ. Yin irom aroma amegoni, ame gin daŋ okwero coggi karacel kede itinogi. Totti obedo dano me Kitti, eka pappi te bedo dano me Amor. 46Aminni adwoŋ, en Camaria ame tye tutuŋ anyarodi, kun bedo karacel anyira mere, aminni atidi mere ame bedo tutuŋ anyarolum en Codom ame daŋ bedo karacel anyira mere. 47Yin rik mom ibedo lubo kitegi keken dok daŋ mom ibedo timo timmogo me kwer ame gin timo keken, cite kite ni yin, oballe oko odoco ame katogi i kare anokkoro keken.”
48Man kop ame Rwot Obaŋa okobo, “Doŋ kite ame atye kede kwo-ni, aminni Codoma karacel kede amego mere, mom obedo timo gin ame yin karacel kede anyirani obedo timo. 49Nen ba, man en bal ame aminni Codoma obedo timo, En karacel kede anyira mere, gin luŋ obedo wakere meicel, pien gin onwoŋo otye kede cam abup ame ocamo loogi aloa, dok daŋ onwoŋo obedo mot kun otye kede kuc, cite gin okwero miyo kit konnyoro ducu baŋ ocan kede baŋ jo ame piny oloo. 50Gin onwoŋo obedo jo ame ŋwette meicel i nyima, kun daŋ obedo timo tim me kwer a kitegi papat; pi mannono ba, i kare ame aneno man, atyekogi oko i nyima.
51“Camaria mom otimo bal, ame romo nucu me bal ame yin ibedo timo, Yin ibedo timo gigi mogo me kwer adwoŋ meicel ame kato meggi oko, Omio yin imio amegoni dok nen acalo jo a kitegi atira pi tim me kwer luŋ ame yin ibedo timo. 52Aman yin doŋ myero iye lewicci giri, yin ikomi, pien balli doŋ rac meicel ame kato me amegoni ducu ame mio amegoni doŋ nen calo jo ame mom otimo balloro, kop ame tye i komgi doŋ doko abeber kato megi oko, yin myero iye lewicci, dok daŋ ikany acae ame jo cai kede, pien yin imio amegoni nen calo jo ame mom otimo balloro.
Rwot bino miyo gum a Codoma karacel kede Camaria dok kakare
53“Abino dwoko gum a Codoma karacel kede pacci ame tye i ŋete, abino daŋ dwoko gum a Camaria karacel kede pacci ame tye i ŋete. Abino dwoko gummi yin i komi daŋ baŋi. 54Ibino kanyo acae, dok daŋ ibino yeyo lewic pi ginnoro luŋ ame yin itimo, ame mannono bino doko gin ame kweo cunygi. 55Aco kop i kom amegoni, Codoma kede pacci ame tye i ŋete, obino dok i lobo ame yam otye iye con, Camaria kede pacci ame tye i ŋete daŋ obino dok i lobo ame rik otye iye con, yin kede pacci ame tye i ŋeti daŋ ibino dok i gum ame yam itye iye con. 56I kare ame rik iwakere-ca, mom rik iloko nyiŋ aminni Codoma odoko gi-acekani, 57i kare ame timmi areco mom ru onen kannaler? Aman yin daŋ doŋ irom aroma kede, idoko doŋ gin ame jo Edom kede jo ame bedo i ŋetgi cao, jo Piriciti kede jo luŋ ame bedo i ŋetgi daŋ cai. 58Itye doŋ ka yeyo peko adwoŋ meicel pi ballogo me lewic kede gigi mogo apol meicel me kwer ame ibedo timo.” Man kop ame Rwot okobo.
Cikere ame perakino atwal
59Rwot Obaŋa okobo ni, “Abino tic kedi kun alubo gin ame yam yin ibedo timo, pien yin rik icao kwoŋ ame rik ikwoŋo dok daŋ ituro cikere ame rik ocikere kede, 60cite an pwod abino po i cikerena ame rik acikere kedi kun yin pwod atin. Abino dok cikere kedi i cikere ame doŋ perakino atwal. 61Mannono bino miyo ipo kite ame ibedo bedo kede, eka lewic te maki ka atyeko kelo amini adwoŋ kede en atidi ate dwokogi baŋi acalo anyirani, cite mom pi cikere ame abin acikere kedi-ni. 62Abino dok moko cikerena kedi, eka ite ŋeyo ni an abedo Rwot. 63I kare ame abino weko balli luŋ ame yam itimo, ibino po pirgi, lewic te maki atek meicel ame mic mom dok iromo ŋamo dogi me kobo kopporo.” Man kop ame Rwot Obaŋa okobo.