13
Kop ame Rwot Obaŋa okobo i kom odwarpiny ame ogoba
1Rwot okobo keda, kun kobo ni, 2“Wot a dano we, rab kop i kom odwarpiny me Icrael, rab kop, ikob baŋ odwarpiny ame gin orabo kop ame otamo atama pirgi kengi kun okobo ni jo winy kop ame Rwot okobo, kun Rwot mom okobo, kobbigi owiny kop ame Rwot okobo, 3Rwot Obaŋa okobo ni, Can bino poto i kom odwarpiny ame miŋ, ame lubo tam ame oya i cunygi kengi, kun nwoŋo mom oneno ginnoro kadi acel. 4Odwarpinywu onwoŋo rom aroma kede ekwe ame tye i boma mogo ame doŋ tye acalo wi obur, ama wun jo Icrael. 5Wun mom iwoto wunu kan ame omuko cel iye, mom daŋ igero wunu apama cel ame muko, wun jo Icrael; mannono en omio jo Icrael mom bino cuŋ kadi acel i kare me lweny i nino a Rwot. 6Anyut luŋ ame gin okobo ni onyuttigi obedo kop me goba. Gin ame gin tyeto daŋ obedo kop me goba keken. Gin bedo kobo ni, ‘Rwot okobo ni’, aco kono nwoŋo Rwot mom okobo, kun gin nwoŋo atamo ni Rwot myero mi gin ame gin okobo cobere. 7Anyut ame gin okobo ni oneno-nono, obedo goba, dok kopporo luŋ ame gin tyeto daŋ obedo goba, an gire nwoŋo mom akobbigi kopporo. Man kop ame Rwot okobo.”
8Mannono omio Rwot Obaŋa okobo ni, “Atye i, kop i komwu, pien wun itye ka kobo kop me goba, dok anyut ame ikobo ni ineno wunu daŋ goba keken, 9An doŋ aceggi keto can i komwu, wun odwarpiny ame ineno wunu anyut me bwolo ka jo, dok ame ityeto wunu tyet me gobagoba. Ikwerogu coyo wunu nyiŋwu karacel i jona Icrael, mom gire ibino dok i lobowu kadi acel. Mannono bino miyo iŋeo wunu ni a Rwot Obaŋa. 1013.10: Jer. 6.14; 8.11Pien gin odwarpiny obedo miyo jona rwenyo kun okobo ni, ‘Kuc tye’, aco kono kuccoro mom. Dok ka jona ogero apama cel, odwarpiny bino puo oko i coka atar. 11Kobbi wunu jo ame puo apama kede raŋi atarrono ni, apamanono bino rette oko piny, kot bino cwe atek meicel, i twon pee adwoŋ a mom twerre, karacel i yamo kot ame abukoro okato kare, bino bukoro i kor apama-nono. 12Apama cellono bino mukere te rette oko piny, jo te penyowu ni kara coka ame yam ipuo wunu i kor apama-ni tye kwene.”
13Mannono omio Rwot Obaŋa okobo ni, “Abino miyo yamo kodo atek meicel i twon akemo adwoŋ meicel, dok abino miyo kot daŋ cwe adwoŋ meicel, kede pee, kun pee daŋ corre piny i twon akemona kede waŋcunnya, me muko apama cel reto oko piny. 14Abino muko apama cel ame opuo i raŋi atar areto oko piny, acakki tere te doŋ nono. Ka apama cellono orette oko piny, wun daŋ ibino to wunu oko ducu. Mannono bino miyo iŋeo wunu ni an a Rwot. 15Man en kite ame abino wuko kede akemona i kom apama cel, kede i kom jo ame opuo apama cel kede coka atar. Abino kobbiwu ni, ‘Apama cel doŋ mom tye, akadi jo ame yam opuo i coka atar daŋ mom tye, 16anaka odwarpiny me Icrael ame obedo rabo kop i kom Jerucalem, kun okobo ni onyuttigi anyuttogo ame nyuto kuc ame bino bedo iye, kun kono kuccoro mom. Man kop ame Rwot Obaŋa okobo.’
Rwot okobo kop i kom odwarpiny a mon
17“Aman doŋ ba, yin wot a dano, koŋ dok icak loko waŋi inen anyirawu me Icrael, ame tye ka rabo kop ame gin otamo atama i cunygi; rab kop i komgi, 18i kobbigi kop ame an Rwot Obaŋa akobo: Abino miyo can poto i kom mon ame kwoo lwit, ote tweyo i ŋut ciŋ jo, dok ame tye ka kwoyo boŋo me wumo wi jo, kun nwoŋo okwo lwit iye, pi jo adoŋo kede jo atino, kun olubo kit ame dano moro-ni tye kede. Man itye ka timo wunu me mito ni ibed wunu kede twer i kom kwo kede to i kom jona pi nwoŋo lim pirwu kenwu. 19Itye wunu ka pyeda i akina jona, pi cayiri ame poŋ ka gwata tok acel keken, kede pi ogati mogo atitino, kun ineko wunu ŋat ame onwoŋo myero mom to, ite weko wunu dano ame onwoŋo myero to, te bedo kwo, pi kopwu me gobagoba ame itye wunu ka kobo baŋ jona ame ciko yitgi me winyo kop me gobagobanono.
20“Mannono omio Rwot Obaŋa okobo kop man: Nen ba, an adag lwit ame itye ka kwoyo wunu i komwu, me bedo kede twer i kom kwo a dano kede to mere. Abino codo lwitewu-nono oko i ŋut ciŋwu, ate weko tipo a jo ame onwoŋo ibedo gwoko wunu-nono wot oko ata kun mom atimo ginnoro i komgi. 21Abino yeco daŋ boŋo ame iwumo i wiwu oko, ate laro jona oko i ciŋwu, gin mom doŋ te medde bedo i te twerwu kadi acel. Mannono bino miyo iŋeo wunu ni an a Rwot.
22“Pien ibala wunu cuny jo ame kitegi atira i kop me nononono, kadi bed an mom onwoŋo abalo cunygi; icukoro wunu cuny jo areco ni myero gin omedde ameda i timgi areco me kur olar kwogi. 23Pi mannono ba, mom dok ibino medde wunu neno anyuttogo me goba, dok daŋ mom ibino tyet wunu tyettoro kadi acel, abino laro jona oko i ciŋwu. Man bino miyo iŋeo wunu ni an a Rwot.”